काठमाडौँ । पृथ्वी राजमार्गअन्तर्गत धादिङको मलेखु-मुग्लिन सडकखण्ड आज (सोमबार) तीन घण्टाका लागि पूर्ण रूपमा बन्द गरिने भएको छ । बेनीघाट रोराङ गाउँपालिका-९ स्थित मझिमटारमा निर्माणाधीन आकाशे पैदल पुलको यात्रु आवागमन गर्ने भाग (गर्डर) राख्ने काम गर्नुपर्ने भएकाले सवारी आवागमन रोक्न लागिएको हो ।
जिल्ला प्रशासन कार्यालय धादिङले सार्वजनिक गरेको सूचनाअनुसार सोमबार बिहान ११ बजेदेखि दिउँसो २ बजेसम्म उक्त सडकखण्डमा सबै प्रकारका सवारीसाधनको आवागमन पूर्ण रूपमा बन्द हुनेछ ।
नागढुङ्गा-मुग्लिन सडक आयोजना पश्चिम खण्डका सूचना अधिकारी सचेन्द्र मिश्रका अनुसार मझिमटारमा आकाशे पुलको गर्डर राख्ने कार्यका लागि सडक बन्द गर्न लागिएको हो । निर्माण कार्यका क्रममा सम्भावित जोखिम न्यूनीकरण गर्दै काम सुरक्षित रूपमा सम्पन्न गर्न सवारी आवागमन रोक्नुपर्ने भएको हो ।
निर्धारित समय अवधिभर मलेखुबाट मुग्लिनतर्फ र मुग्लिनबाट मलेखुतर्फ आवतजावत गर्ने सबै प्रकारका सवारीसाधन प्रभावित हुनेछन् । यसमा निजी सवारी, सार्वजनिक यातायात तथा मालवाहक सवारीसाधनसमेत पर्नेछन् ।
सडक बन्द रहने अवधिमा यात्रा गर्ने यात्रु तथा सवारी चालकलाई समय व्यवस्थापन गरेर यात्रा गर्न र आवश्यकताअनुसार वैकल्पिक मार्ग प्रयोग गर्न प्रशासनले अनुरोध गरेको छ ।
आयोजनाले सडक बन्द रहने समयमा सवारी चालक तथा यात्रुलाई धैर्यतापूर्वक यथास्थानमा रहन, लेन अनुशासन कायम गर्न र ट्राफिक नियमको पूर्ण पालना गर्न आग्रह गरेको छ ।
पृथ्वी राजमार्ग काठमाडौँ उपत्यकालाई धादिङ, चितवन, पोखरा तथा पश्चिम नेपालका विभिन्न जिल्लासँग जोड्ने प्रमुख सडक मार्ग हो । त्यसैले मझिमटारमा हुने तीन घण्टाको अवरोधले यस मार्ग हुँदै यात्रा गर्ने यात्रु तथा मालवाहक सवारीसाधनको आवागमन प्रभावित हुन सक्छ ।
विशेषगरी काठमाडौं-पोखरा, काठमाडौँ-चितवन तथा पश्चिम नेपालतर्फ जाने सवारीसाधन प्रभावित हुनेछन् । निर्माण कार्य निर्धारित समयमै सम्पन्न भए दिउँसो २ बजेपछि सडकमा आवागमन पुनः सञ्चालन हुने बताइएको छ ।
