आजबाट राष्ट्रिय परिचयपत्र वितरण, यस्ता छन् यसका प्रयोग र फाइदा

आजबाट राष्ट्रिय परिचयपत्र वितरण, यस्ता छन् यसका प्रयोग र फाइदा

काठमाडौँ, मंसिर ३ । सरकारले सोमबारबाट राष्ट्रिय परिचय पत्र वितरण गर्ने भएको छ । आगामी ३ बर्षभित्र सबै नागरिकलाई राष्ट्रिय परिचयपत्र वितरण गरिसक्ने लक्ष्य बनाएको सरकारले पाँचथरबाट परिचयपत्र वितरण शुरु गर्न लागेको हो ।

पाँचथरमा एक सय एक बर्षकी वयोवृद्धालाई सबेैभन्दा पहिले परिचयपत्र वितरण गर्ने कार्यक्रम रहेको जिल्ला प्रशासन कार्यलय पाँचथरले जनाएको छ । फिदिम नगरपालिका ४ शान्तिपुरकी भगवतिदेवी भण्डारीलाई गृहमन्त्री रामबहादुर थापा बादलको हातबाट परिचयपत्र प्रदान गर्ने कार्यक्रम रहेको राष्ट्रिय परिचयपत्र तथा पञ्जीकरण विभागका निर्देशक चोमेन्द्र न्यौपानेले बताएका छन् । त्यसका लागि गृहमन्त्री आजै पाँचथर जाने भएका छन् ।

पाँचथरमा ५२ हजारभन्दा बढीको विवरण संकलन गरिएको छ तर तात्कालिन अवस्थामा २४ सय परिचयपत्र जिल्लामा पुगेको हुनाले सबैलाई वितरण गर्न नसकिने जिल्ला प्रशासन कार्यलय पाँचथरले जनाएको छ । राष्ट्रिय परिचयपत्र तथा पञ्जीकरण विभागले यसै आर्थिक वर्षमा प्रदेश १ का झापा र संखुवासभामा परिचयपत्र वितरणको लक्ष्यका साथ त्यहाँ विवरण संकलन गरिरहेको छ ।

त्यसैगरी प्रदेश २ का महोत्तरी र सप्तरी, प्रदेश ३ को ललितपुर, रसुवा र चितवन, गण्डकी प्रदेशको तनहुँ र स्याङ्जाका नागरिकलाई पनि यही आर्थिक वर्षभित्र राष्ट्रिय परिचयपत्र वितरण गर्ने विभागको तयारी छ ।प्रदेश ५ को कपिलबस्तु र गुल्मी, कर्णाली प्रदेशका सल्यान र जुम्ला तथा सुदूरपश्चिम प्रदेशका कञ्चनपुर र अछाम जिल्लामा पनि विभागले यही वर्ष परिचयपत्र दिने गरी काम गरिरहेको जनाएको छ ।

राष्ट्रिय परिचय पत्रको प्रयोग र फाइदा यस्ता छन्:

प्रयोग

नागरिकलाई विभिन्न किसिमका सेवा सुविधा उपलब्ध गराउन सहयोग पुर्‌याउने बहुउपयोगी कार्डका रुपमा राष्ट्रिय परिचयपत्र प्रयोग हुनेछ जस्तै :-

  •  ब्यक्तिको राष्ट्रिय पहिचानपत्रको रूपमा ।
  • मतदाता परिचयपत्रको रूपमा ।
  • जग्गा जमिन र अन्य सम्पतिको अभिलेखका रूपमा ।
  • बैंकिङ कारोवारको अभिलेखको रूपमा ।
  • सामाजिक सुरक्षा कार्डका रूपमा ।
  • सुरक्षा व्यवस्थापनको लागि सहयोगी अभिलेखका रूपमा।

फाइदा

राष्ट्रिय परिचयपत्र जारी भएपछि मुख्यत: निम्नानुसारका फाइदाहरू हासिल गर्न सकिनेछ :-

  •   ब्यक्तिको पहिचानसम्बन्धी समस्या समाधान हुने,
  •   ब्यक्तिको जैविक तथा व्यक्तिगत विवरण प्राप्त हुने,
  •   एउटै राष्ट्रिय परिचयपत्रबाट विविध सेवा प्राप्त हुने,
  •   राष्ट्रिय विकासका योजना निर्माण,कार्यक्रम संचालन र सुरक्षा कायम गर्न सजिलो हुने,
  •   नेपाली, गैर आवासीय-नेपाली र विदेशीको तथ्यांक यकिन हुने।
  •   दोहोरो परिचय वा नक्कली परिचय बनाउने जस्ता अपराध नियन्त्रण हुने ।

Trending News