फाइल
काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले विभिन्न सहकारी ठगीसम्बन्धी मुद्दामा अदालतले तोकेको धरौटी बुझाउँदै क्रमशः थुनामुक्त हुँदै आएका छन् । थुनामुक्त हुन लामिछानेले हालसम्म ५ करोड २७ लाख रुपैयाँ धरौटी बुझाइसकेको पाइएको छ ।
लामिछानेले कास्की, काठमाडौं र चितवनका सहकारी ठगी मुद्दामा जिल्ला अदालतहरूको आदेशअनुसार धरौटी बुझाएर थुना मुक्त भएका थिए । कास्कीस्थित सूर्यदर्शन सहकारी ठगी मुद्दामा उनले ६५ लाख रुपैयाँ धरौटी बुझाएका थिए ।
त्यसैगरी काठमाडौंको स्वर्णलक्ष्मी सहकारी ठगी मुद्दामा ६० लाख र चितवनको सहारा सहकारी ठगी मुद्दामा ५४ लाख रुपैयाँ धरौटी बुझाएर उनी थुनामुक्त भएका थिए ।
यी तीनवटै मुद्दामा धरौटी बुझाइसकेपछि पनि उनी रूपन्देहीसँग सम्बन्धित सहकारी ठगी मुद्दाका कारण थुनामा रहेका थिए । उक्त मुद्दामा उच्च अदालत बुटवल (तुल्सीपुर इजलास)ले बिहीबार २ करोड ७४ लाख ८४ हजार रुपैयाँ धरौटीमा रिहा गर्न आदेश दिएसँगै लामिछाने आज थुनामुक्त हुने भएका हुन् ।
अदालतको आदेशअनुसार धरौटी बुझाइसकेका छन् । केही अदालती प्रक्रिया पूरा भएसँगै उनी आजै थुनामुक्त हुने तयारीमा छन् ।
अदालतहरूले तोकेको धरौटी रकमका आधारमा हेर्दा हालसम्म रवि लामिछानेले चारवटा अदालतमा गरी कुल ५ करोड २७ लाख रुपैयाँ धरौटी बुझाइसकेका छन् ।
सहकारीको बचत रकम दुरुपयोग गरिएको भन्ने आरोपमा उनीविरुद्ध सहकारी ठगी, संगठित अपराध तथा सम्बन्धित कानुनी प्रावधान अन्तर्गत मुद्दा दायर भएका थिए ।
लामिछाने पक्षले भने आफू सहकारीको दैनिक सञ्चालन वा रकम हिनामिनामा संलग्न नरहेको दाबी गर्दै आएको छ । यता सरकारी वकिल पक्षले भने सहकारीको रकम अन्यत्र प्रयोजनमा प्रयोग गरिएको तथा त्यसमा प्रत्यक्ष–परोक्ष संलग्नता देखिएको दाबी गरेको छ ।
धरौटीमा रिहा भए पनि यी मुद्दाहरूको अन्तिम टुंगो भने अदालतको आगामी सुनुवाइ र फैसलाबाट मात्र लाग्नेछ । सहकारी ठगी प्रकरणमा एक प्रभावशाली राजनीतिक दलका शीर्ष नेतामाथि मुद्दा चलिरहेकाले यसले राजनीतिक तथा सार्वजनिक क्षेत्रमा व्यापक चासो र बहस सिर्जना गरेको छ ।
