काठमाडौं । निर्वाचन आयोगले समानुपातिक निर्वाचन प्रणालीअन्तर्गत बन्दसूची पेश गर्ने विषयमा राजनीतिक दलहरूलाई लक्षित गरी दुईदिने अभिमुखीकरण कार्यक्रम सञ्चालन गर्ने भएको छ । आगामी फागुन २१ गते तय भएको प्रतिनिधि सभा निर्वाचनका लागि समानुपातिकतर्फ बन्दसूची पेश गर्ने तयारीका सन्दर्भमा आयोगले करिब १०० राजनीतिक दललाई सहभागी गराउने जनाएको छ ।
आयोगका अनुसार बन्दसूची तयार गर्दा संविधान तथा कानुनले तोकेको समावेशी मापदण्ड पालना गराउने उद्देश्यले अभिमुखीकरण कार्यक्रम आयोजना गर्न लागिएको हो । विगतका निर्वाचनमा बन्दसूची पेश गर्दा देखिएका प्राविधिक त्रुटि, कोटा नमिल्ने समस्या तथा कानुनी जटिलता दोहोरिन नदिन आयोगले यसपटक पूर्वतयारीलाई जोड दिएको छ ।
निर्वाचन आयोगकाअनुसार धेरै राजनीतिक दल, विशेषगरी साना र नवदर्ता दलहरू, समानुपातिक प्रणालीको प्रक्रिया र मापदण्डबारे पूर्णरूपमा जानकार नहुँदा अन्तिम समयमा सूची सच्याउनुपर्ने अवस्था आउने गरेको छ । यस्तो अवस्था न्यूनीकरण गर्न आयोगले दलहरूलाई समयमै स्पष्ट निर्देशन दिन लागेको हो ।
अभिमुखीकरण कार्यक्रममा समानुपातिक निर्वाचन प्रणालीको संवैधानिक व्यवस्था, बन्दसूची तयार गर्ने विधि, महिला, दलित, आदिवासी जनजाति, मधेसी, खस आर्य तथा अपांगता भएका व्यक्तिको समावेशी अनुपात मिलाउने प्रक्रिया र बन्दसूची पेश गर्ने प्राविधिक पक्षबारे जानकारी दिइने आयोगले जनाएको छ ।
निर्वाचन आयोगका अनुसार यस कार्यक्रमबाट दलहरूले बन्दसूची तयार गर्दा आवश्यक सावधानी अपनाउने र निर्वाचनपछि उत्पन्न हुने विवाद तथा उजुरीको संख्या घट्ने अपेक्षा गरिएको छ ।
