काठमाडौँ । आसन्न प्रतिनिधि सभा निर्वाचनका लागि राजनीतिक दलहरूले समानुपातिक प्रणालीतर्फका उम्मेदवारको बन्दसूची पेस गर्ने समय आजदेखि सुरु भएको छ। निर्वाचन आयोगले तोकेको कार्यतालिका अनुसार आजदेखि दलहरूले आफ्नो बन्दसूची आयोगमा दर्ता गराउन सक्नेछन्।
निर्वाचन आयोगका अनुसार समानुपातिक उम्मेदवारको बन्दसूची संविधान र प्रचलित कानुनले व्यवस्था गरेको समावेशी सिद्धान्तअनुसार हुनुपर्नेछ। सूचीमा महिला, दलित, आदिवासी जनजाति, मधेसी, थारू, मुस्लिम तथा पिछडिएका क्षेत्रका नागरिकहरूको अनिवार्य सहभागिता सुनिश्चित गर्नुपर्ने व्यवस्था छ।
राजनीतिक दलहरू आन्तरिक छलफल तथा सिफारिसका आधारमा बन्दसूची तयार गर्ने तयारीमा जुटेका छन्। बन्दसूचीमा परेका उम्मेदवारहरू प्रत्यक्ष निर्वाचनमा उम्मेदवार बनेका हुन नपाउने व्यवस्था रहेको छ।
निर्वाचन आयोगले तोकिएको समयसीमाभित्र बन्दसूची पेस नगर्ने दललाई समानुपातिक प्रणालीतर्फ सहभागी गराइने छैन भन्ने स्पष्ट पारेको छ। आयोगले बन्दसूची प्राप्त भएपछि आवश्यक जाँचबुझ गरी अन्तिम नामावली सार्वजनिक गर्ने जनाएको छ।
आसन्न प्रतिनिधि सभा निर्वाचनलाई स्वच्छ, निष्पक्ष र समावेशी बनाउन आयोगले सबै राजनीतिक दललाई कानुनी मापदण्ड पालना गर्न आग्रह गरेको छ।
