कांग्रेस अधिवेशन : दोस्रो चरणको निर्वाचन दिउँसो साढे ३ बजेदेखि सुरु हुँदै

काठमाडौं- नेपाली कांग्रेसको सभापति पदका लागि दोस्रो चरणको निर्वाचन दिउँसो साढे ३ बजेदेखि सुरु हुँदैछ । केन्द्रीय निर्वाचन समितिले मतदानका लागि साढे ३ बजेदेखि साढे ७ बजेसम्मको समय निर्धारण गरेको हो ।

दोस्रो चरणको चुनावमा शेरबहादुर देउवा र शेखर कोइरालाबीच प्रतिस्पर्धा हुने छ ।  निर्वाचन समितिका अनुसार पहिलो चरणको चुनावमा देउवाले २२५८ र कोइरालाले १७०२ मत पाएका छन् ।

३७१ मत पाएर तेस्रो स्थानमा रहेका प्रकाशमान सिंह, २५० मत पाएर चौथो स्थानमा विमलेन्द्र निधि र पाँचौ स्थानमा रहेका कल्याण गुरुङ सभापति पदको दोस्रो चरणको निर्वाचनबाट बाहिरिएका छन् । सिंहको समर्थनसँगै देवाले जित्ने आंकलन गरिएको छ ।

पहिलो चरणमा निर्वाचित हुन देउवालाई ८२ मत अपुग भएको हो । पहिलो चरणमै जित निकाल्नका लागि बहुमत अर्थात् २३४० मत आवश्यक थियो । ४ हजार ७ सय ४३ प्रतिनिधिहरूमध्ये ४ हजार ६ सय ७९ मत खसेको थियो ।