सेनाको हेलिकप्टरबाट सुर्खेत लगियो बालकुमारी घटनामा मृत्यु भएका दुई युवाको शव

काठमाडौं । गत पुस १३ गते ललितपुरको बालकुमारीमा इपिएस कोरिया शाखामा भाषा परीक्षाको आवेदन दिन पुगेका र प्रहरीबीच झडप हुँदा ज्यान गुमाएका दुई जनाको शव नेपाली सेनाको स्काई ट्रकमार्फत् सुर्खेत विमानस्थल लगिएको छ । मंगलबार बिहान साढे १० बजे त्रिभुवन अन्तर्राष्ट्रिय विमानस्थलबाट सेनाको स्काई ट्रकमा राखेर लगिएको जिल्ला प्रहरी परिसर ललितपुरका एसपी नवराज कार्कीले जानकारी दिए।
गत शुक्रबार बालकुमारीमा झडप हुँदा दैलेखका सुजन रावत र अछामका वीरेन्द्र शाहको मृत्यु भएको थियो । सुजनको इमाडोलस्थित किष्ट अस्पतालमा मृत्यु भएको थियो भने वीरेन्द्रको पाटन अस्पतालमा मृत्यु भएको थियो।
दुबैको शवको पोष्टमर्टम पाटन अस्पतालमा गरिएको थियो । प्रहरीका अनुसार दुबैको शव मंगलबार बिहान त्यहाँबाट छुट्टाछुट्टै हेलिकप्टरमा राखेर घर पु¥याइने छ ।
मृतक परिवारले विभिन्न माग राखेर आन्दोलन गर्दै आएको थियो। सरकारसँग सोमबार भएको छलफलमा चार बुँदे सहमति समेत भएको थियाे।
सरकारले मृतक दुबै जनाको शव सम्बन्धित जिल्लामा पठाइदिने सहमति गरेको थियो। मृतक परिवारलाई सरकारले १०–१० लाख रुपैयाँ दिने, त्यसबाहेक मृतक परिवारका सदस्य एक–एक जनालाई रोजगारी दिने पनि निर्णय भएको छ ।
दुबै मृतकलाई शहीद घोषणाका लागि पहल गर्ने र दुबै जनाको शव परिवारले बुझ्ने पनि सहमति भएको थियो ।