
काठमाडौं, साउन ५ । अविरल वर्षासँगै चीनको खासा क्षेत्रमा रहेको ‘केरुङ च्छो’ ताल भरिएको छ ।
चिनियाँ अधिकारीहरुबाट न्यालम क्षेत्रमा अत्याधिक वर्षा भइरहेको र यो पोखरी फुट्नसक्ने सम्भावना रहेको खबर प्राप्त भएको जिल्ला प्रशासन कार्यालय सिन्धुपाल्चोकले जनाएको छ । ‘उनीहरुले आफ्ना नागरिकलाई भटाभट माथिल्लो भागमा सारिरहेका छन्’ प्रमुख जिल्ला अधिकारी उमेशकुमार ढकालले भने, ‘त्यही भएर हामीले पनि सतर्कता अपनाउनु पर्ने भएको छ ।’
जिल्ला प्रशासनले सोमबार सूचना जारी अविरल वर्षाका कारण चीनको खासा क्षेत्रमा रहेको ‘केरुङ च्छो’ ताल फुट्ने जोखिममा रहेको भन्दै नागरिकलाई सुरक्षित ठाउँमा लैजाने व्यवस्था मिलाउन समितिलाई अनुरोध गरेको हो ।
पोखरी फुटेमा भोटेकोशी नदीमा आकस्मिक पानीको वाहाव अत्याधिक बढने भइ नदी किनारको बस्तीमा ठूलो क्षति पुर्याउन सक्ने भन्दै स्थानीय तह सरोकारवालाहरुलाई सतर्क र सचेत रहन भनेको छ ।
ताल फुटे सिन्धुपाल्चोकका भोटेकोशी गाउँपालिका र बाह्रबिसे नगरपालिका लगायतका स्थानीय तहमा क्षति पुग्ने प्रशासनले जनाएको छ ।
