काठमाडौं । अवैध लागूऔषधसहित २ जना पक्राउ परेका छन् । कैलालीको गौरीगंगा नगरपालिका–४ राजीपुर खल्ला बजारस्थित सडकबाट अवैध लागूऔषध चरेस जस्तो देखिने पदार्थ ४ केजी ७ सय १० ग्राम र नगद १८ हजार ५ सय भारतीय रूपैयाँसहित एक जना पक्राउ परेका छन् । पक्राउ पर्नेमा बझाङ सुर्मा गाउँपालिका–४ ठगुनडाँडा बस्ने ४४ वर्षीय सालीभान पुजारा रहेका छन् । नेपाल प्रहरी प्रदेश कार्यालय महेन्द्रनगर र लागूऔषध नियन्त्रण ब्यूरो कोटेश्वर काठमाडौंबाट खटिएको प्रहरी टोलीले उनलाई
उक्त पदार्थसहित बिहीबार दिउँसो पक्राउ गरेको हो ।
यसैगरी कास्कीको पोखरा महानगरपालिका–३० पावरहाउसबाट अवैध लागूऔषध गाँजा २ केजी १ सय ७० ग्रामसहित एक जना पक्राउ परेका छन् । पक्राउ पर्नेमा सोही महानगरपालिका–२१ कृष्ती घर भई हाल सोही महानगरपालिका–१५ फुलवारी गैह्रगाउँ बस्ने १९ वर्षीय राजन विक रहेका छन् । ईलाका प्रहरी कार्यालय शिसुवा कास्कीबाट खटिएको प्रहरी टोलीले उनलाई उक्त गाँजासहित बिहीबार दिउँसो पक्राउ गरेको हो ।
दुवै घटनाका सम्बन्धमा प्रहरीले आवश्यक अनुसन्धान गरिरहेको छ ।
