ओली र मोदीद्धारा दक्षिण एसियाकै पहिलो क्रस बोर्डर पेट्रोलियम पाइपलाईनको उद्घाटन
काठमाडौँ, भदौ २४ । प्रधानमन्त्री केपी शर्मा ओली भारतीय समकक्षी नरेन्द्र मोदीले विद्युतीय रिमोटद्धारा मोतिहारी–अम्लेखगंज पेट्रोलियम पाइपलाइनको सयंक्त रुपमा उद्घाटन गरेका हुन् । भारतबाट नेपाल जोड्ने ऐतिहासिक पेट्रोलियम पाइपलाई मंगलबार उद्घाटन भएको हो । मंगलबार उद्घाटन भएको पेट्रोलियम पाइपलाइन दक्षिण एसियाकै पहिलो अन्तरदेशीय पेट्रोलियम पाइपलाइन रहेको छ ।
सिंहदरबारबाट प्रधानमन्त्री र नयाँ दिल्लीबाट भारतीय प्रधानमन्त्री नरेन्द्र मोदीले एकैसाथ रिमोट थिचेका थिए । मोतिहारी अमलेखगञ्ज पेट्रोलियम पाइपलाइनको उद्घाटन भएपछि प्रधानमन्त्री केपीशर्मा ओलीले खुशी व्यक्त गरेका छन् । ट्वीटमार्फत उनले तोकिएको समय भन्दा पहिले नै परियोजना सम्पन्न भएकोमा भारतीय प्रधानमन्त्री मोदीलाई धन्यवाद समेत दिएका छन् ।
पेट्रोलियम पाइपलाइनको सुरुवात भएसँगै अब नेपालमा तेल ढुवानी सहज हुने भएको छ । अब ढुवानी लागत, बाटोको कठिनाइ, जोखिमता लगायतका विविध समस्याहरु हल हुने र यसले पेट्रोलियम पदार्थको बजार मूल्यमा समेत फरक पार्ने नेपाल आयल निगमले जनाएको छ ।
मोतिहारी–अमलेखगञ्ज पाइपलाइन नेपालतर्फ ३६ किमी र बाँकी २७.२ किमी भारततर्फ गरी कुल ६९.२ किलोमिटर पाइपलाइन बिछ्याइएको हो ।
उद्घाटनसँगै पाइपलाइनबाटै भारतबाट नेपालमा पेट्रोलियम पदार्थ आपूर्ति सुरू भएको छ। त्यसका लागि नेपाल आयल निगमको अमलेगञ्ज डिपोमा १६ हजार किलोलिटर भण्डारण गर्ने ट्याङ्की निर्माण गरिएको छ।
सुरुमा पाइपलाइनबाट साढे छ सय किलोलिटर पानी र एक हजार किलोलिटर डिजेल पठाएर परीक्षण गरिएको थियो। परीक्षणका क्रममा पटनाबाट अमलेखगञ्जसम्म डिजल आइपुग्न करीब १८ घण्टा लागेको बताइएको छ। पेट्रोलियम पदार्थ भारतको बरौनीदेखि बिहारको राजधानी पटना, मोतिहारी र अमलेखगञ्जसम्मको भू–भागबाट आएको डिजेलको शुद्धतासमेत परीक्षण भइसकेको छ।
नेपाल आयल निगम र इण्डियन आयल कर्पोरेशनको करिब ७५ करोड रुपैयाँ संयुक्त लगानी रहेको पाइपलाइन परियोजना कार्यालय सिमराले जनाएको छ।
