नेविसंघले ७७ वटै जिल्लामा प्रधानमन्त्रीको पुत्ला जलाउने

diyopost.com
Diyo post  आइतबार, कार्तिक २५, २०७५ | ७:४८:४१

काठमाडौं, कात्तिक २५ । नेपाल विद्यार्थी संघले प्रधानमन्त्री केपी ओलीको पुत्ला जलाउने भएको छ । तपेश्वर उच्च माध्यामिक विद्यालय काभ्रेका ईकाइ अध्यक्ष कृष्ण ढकाललाई फेसबुकमा सेयर गरेको पोस्टका विषयमा पक्राउ गरेको चार दिन बित्दा पनि नछोडेको भन्दै विरोधमा पुत्ला दलन गर्नेदेखि विरोधका कार्यक्रम सार्वजनिक गरिएको जानकारी उनले दिए ।

महरतका अनुसार कात्तिक २५ र २६ गते काभ्रेका सम्पूर्ण विद्यालय बन्द गर्ने, नेविसंघ केन्द्रीय समितिले २६ गते ७७ वटै जिल्लामा प्रधानमन्त्रीको पुत्ला दहन गर्ने र २८ गते सबै जिल्ला सदरमुकाममा २ घण्टा चक्का जाम गर्ने कार्यक्रमहरु सार्वजनिक गरेको छ । ‘यति गर्दा पनि सरकारले सुनेन भने हाम्रो आन्दोलनको रुप फरक हुनेछ ।’ उनले चेतावनी दिँदै भने ।

यस्तो छ नेविसंघको चेतावनी

शनिबार रिपोर्टर्स क्लब नेपालमा पत्रकार सम्मेलन गरेर सभापति महरले जनताका अधिकार र महंगीको बारेमा सरकार बेखबर रहेको र आफ्ना कार्यकर्ताहरुलाई विभिन्न बहाना बनाएर जेलमा कोच्ने काम गरेको भन्दै आपत्ति जनाए । नेता ढकालको रिहाईको लागि आफूहरुले शान्तिपूर्ण धर्ना र जुलुस गरिरहेको बताउँदै यति गर्दापनि रिहाई नगरे कडा आन्दोलनमा उत्रिने उनको चेतावनी थियो ।

गत कात्तिक २० गते कुकुर तिहारको दिनमा कुकुरको टाउको जोडिएको फेशबुक वालमा आएको फोटो सेयर गरेको आरोपमा पक्राउ परेका काभ्रेका १६ वर्षीय कृष्ण ढकालले अन्जानमा सेयर भएको भनेर माफि माग्दासमेत हिरासतमा राखिएको भन्दै सभापति महरले तत्काल रिहाई गर्न सरकारसँग माग गरेका छन् ।

उनले भने,‘कात्तिक २० गते अरुले हालेको फोटो सेयर गरेका नेविसंघका नेतालाई सरकारका सञ्चारमन्त्री गोकुलप्रसाद बाँस्कोटाको ठाडो आदेशमा प्रक्राउ गर्न लगाईएको छ, अन्जानमा भएका कुरालाईसमेत यति ठूलो विषय बनाएर सरकारविरुद्ध आलोचना गर्दा सहन नसक्ने स्थितिमा पुगेको प्रमाणित गरेको छ, म यसै पत्रकार सम्मेलनमार्फत प्रधानमन्त्री केपी शर्मा ओलीलाई चेतावनी दिन चाहन्छु, जनताका दुःख र पीडामा साथ नदिने सरकारले आफ्ना गल्तिका बारेमा बोल्दा वा सांकेतिक रुपमा बिरोध जनाउँदा तानाशाही प्रवृति देखाउन बन्द गरोस् ।’
महरले सरकार बलात्कार, कालोबजारी गर्ने र हत्याराहरुको संरक्षणमा लागेको आरोप लगाए । उनले वर्तमान सरकार कम्युनिष्टबाहेकका विचार बोकेका मानिसलाई देख्नै नसक्ने स्थितिमा पुगेको पनि आरोप लगाए ।

उनले भने,‘सरकारलाई हामीले सर्वसत्तावादको बाटोमा जाँदैछ भनेका थियौं, आज नेविसंघ काभ्रेका नेतालाई पक्राउ गरेर त्यो चरित्र उदाङ्गो भएको छ ।’ तत्काल ढकाललाई रिहाई नगरिए देशभरका नेविसंघका कार्यकर्ताले प्रधानमन्त्रीको उक्त तस्वीर फेसबुकमा सेयर गर्ने चेतावनी महरले दिए ।

सम्बन्धित खबर