उपराष्ट्रपति पुनसँग फिलिपिन्सकी समकक्षीको भेट, दुई देशबिचको सम्वन्ध अझै सुमधुर बनाउन जोड

diyopost.com
Diyo post  शुक्रबार, मंसिर १४, २०७५ | १८:२२:२८

काठमाडौं, १४ मंसिर ।उपराष्ट्रपति नन्दबहादुर पुन ‘पासाङ’सँग फिलिपिन्सकी समकक्षी मारिया लेनोर जेरोना रोब्रेडोले शिष्टाचार भेट गरेका छन् । एशिया प्रशान्त शिखर सम्मेलनमा भाग लिन नेपाल आएकी फिलिपिन्सकी उपराष्ट्रपतिले शुक्रबार दिउँसो उपराष्ट्रपतिको कार्यालय बहादुर भवन पुगेर नेपाली समकक्षीसँग शिष्टाचार भेट गरेका हुन् । समकक्षी बीचको भेटमा दुई देशको सम्बन्ध र सहकार्यको लगायतको बारेमा छलफल भएको छ ।
फिलिपिन्सका समकक्षीसंगको भेटमा उपराष्ट्रपति पुनले दुई देशबिचको सम्वन्धलाई अझै सुमधुर बनाउनुपर्ने बताए । ‘नेपाल र फिलिपिन्सबीच औपचारिक कुटनीतिक सम्बन्ध स्थापना भएको साठी वर्ष पुग्दैछ । पूर्वी दर्शनको मान्यता अनुसार साठी वर्ष अत्यन्त शुभ वर्ष हो’, उपराष्ट्रपति पुनल भने, ‘कुटनीतिक सम्बन्धको साठी वर्षले दुई देशबीचको सम्बन्ध अझै प्रगाढ बन्ने छ ।’

उपराष्ट्रपतिले नेपालले राजनीतिक स्थायित्व हासिल गरेर आर्थिक समृद्धिको यात्रामा अगाडि बढेको बताए । उहाँले नेपालको आर्थिक समृद्धिका लागि फिलिपिन्ससँग सहकार्य चाहेको समेत बताए ।
‘हामी आर्थिक सामाजिक रुपान्तरण सहितको समुन्नत र समृद्ध नेपाल निर्माण अभियानमा छौँ । नेपालको विकास र समृद्धिका लागि हामी सबै मित्र राष्ट्रसँग सहकार्य गर्न चाहन्छौँ’, उनले भने, ‘नेपाल र फिलिपिन्स दुवै प्राकृतिक रुपमा सुन्दर मुलुक हुन्, दुई देशबीचको सहयोग र सहकार्य अझै फराकिलो बनाउनुपर्दछ ।’

भेटमा उपराष्ट्रपति पुनले नेपालले कृषिको आधुनिकीकरण, पर्यटनको विकास, जलविद्युत उत्पादन तथा विक्रि, जडिबुटीको प्रवद्र्धन र भौतिक पूर्वाधार निर्माणको माध्यामबाट समृद्धि हासिल गर्न खाजेको बताएका छन् । सन् २०२० लाई नेपाल सरकारले नेपाल भ्रमण वर्ष घोषणा गरेको जानकारी गराउँदै त्यस अवसरमा नेपालको भ्रमणका लागि फिलिपिन्सका नागरिकहरुलाई आग्रह समेत गरे ।
नेपालका समकक्षीसँगको भेटमा फिलिपिन्सका उपराष्ट्रपति मारिया लेनोर जेरोना रोब्रेडोले प्राकृतिक सुन्दरताले भरिपूर्ण नेपालको भ्रमण गर्न पाउँदा आफूले गौरव महसुस गरेको बताएकी छिन् । उनले दुई देशको सम्बन्ध प्रगाढ रहेको बताउँदै आउँदा दिनमा थप सुदृढ् हुने बताए । नेपाल र फिलिपिन्सबीच धेरै समानता रहेको चर्चा गर्दै उनले विकास र समृद्धिका लागि सहकार्य गर्नुपर्ने बताए ।

सम्बन्धित खबर