काठमाडौं, २५ कार्तिक । त्रिभुवन विश्वविद्यालय समाजशास्त्र संकायका उपपध्यापक प्रेम चलाउनमाथि सांघातिक आक्रमण गर्ने गिरोहलाई जिल्ला अदालत काठमाडौंले भटाभट रिहा गरेपछि न्याय परिषदमा उजुरी परेको छ ।
जिल्ला अदालत काठमाडौंका न्यायधीश अम्बिका प्रसाद निरौला विरुद्ध उपप्रध्यापक चलाउनेले उजुरी गरेका हुन् ।
न्यायाधिश निरौलाको इजलाशले चलाउनेमाथि ज्यान मार्ने उद्देश्यले आक्रमण गर्ने घटनामा समलग्नहरुलाई धरौटीमा छाड्ने आदेश दिएको थियो ।
२३ कात्तिकमा अदालतले रविनकुमार लामा र रुपेश साहलाई ५० हजार धरौटीमा छाड्न आदेश दिएको थियो । अभियुक्त दीपक ओझालाई पनि धरौटीमा छोडेको थियो । २४ कार्तिकमा २० हजार धरौटीमा थुनामुक्त भएका थिए ।
उपप्राध्यापक चलाउनेलाई २० असोजमा विश्वविद्यालय परिसरमा रहेको नेपाल बैंक लिमिटेडबाट पैसा झिकेर फर्कदै गर्दा सांघातिक आक्रमण गरिएको थियो ।
विश्व विद्यालयकै नेवि संघका नेता हरि आचार्य र योगेन्द्र रावलको निर्देशन र योजनामा सांघातिक आक्रमण भएको घटनामा समलग्नहरुले बयान दिएका थिए ।
प्रहरीले घटनास्थलमा प्रयोग भएको मोटरसाइकल, सीसीटीभी फुटेजजस्ता प्रमाण भेला पारेर ७ जनाविरुद्ध ज्यान मार्ने उद्योगमा मुद्दा दर्ता गरेको थियो । चलाउनेले निरौला विरुद्ध आज उजुरी दिएका हुन् ।
