बालुवाटार जग्गाकाण्डका मुख्य योजनाकार मिनबहादुर गुरुङ पक्राउ पर्ने खतरा !

diyopost.com
दियो पोस्ट  सोमबार, पौष १२, २०७८ | २१:२७:१८

काठमाडौं । प्रहरी अनुसन्धान केन्द्रीय ब्युरो सिआइबीले पछिल्लो समय ठूला अपराधको घटनामा गम्भिर अनुसन्धान थालेको छ । सिआइबीले एमालेका पूर्व सांसद ईच्छाराज तामाङको नेतृत्वमा भएको सिभिल सहकारीको करिब ८ अर्ब भन्दा बढी घोटालाको सफल अनुसन्धान मात्रै गरेको छैन । सहकारी ठगीमा ठूला माछा भनिएका तामाङसहित १२ जनालाई एकै साथ पक्राउ गरेर मुद्दा चलाएको छ ।

त्यस्तै पछिल्लो समय चर्चित बनेको ललिता निवास जग्गा प्रकरणमा पनि सिआइबीले नै एक्सन लिन थालेको छ । सिआइबीले केहीदिन अघि ललिता निवास जग्गा घोटालाका डिजाइनर भनिएका रामकुमार सुवेदी र उनकी पत्नि माधवी सुवेदीलाई नै पक्राउ गरेर मुद्दा चलाएको छ । यो घटनाले ललिता निवास जग्गा घोटालाका ठूला अभियुक्तहरुको मुटुमा काप्न थालेको छ । ललिता निवास जग्गा घोटालाका प्रमुख अभियुक्त मध्येका एक भाटभटेनी सुपरमार्केटका मालिक मिनबहादुर गुरुङ समेत पक्राउ पर्ने देखिएको छ ।
ललिता निवासको करिब ३ सय रोपनी सरकारी जग्गा हिनामिनाको प्रमुख पात्र मानिएका गुरुङ विरुद्ध यसअघि अख्तियार दुरुपयोग अनुसन्धान आयोगले विशेष अदालतमा ५० करोड भन्दा बढी भ्रष्टाचार गरेको भन्दै मुद्दा दायर गरेको थियो ।

सरकारको नाममा रहेको उक्त सरकारी जग्गा मध्ये ११२ रोपनी ४ आना जग्गा मीनबहादुर गुरुङसहित शोभाकान्त ढकाल र रामप्रसाद सुवेदीलगायतसँगको मिलोमतोमा खरिद गरेका थिए । सुवेदीको नाममा मात्रै २२ रोपनी जग्गा रहेको सिआइबीको अनुसन्धानमा देखिएको छ ।

व्यक्तिका नाममा सारिएको बालुवाटारको ११२ मध्ये आधाभन्दा बढी जग्गा गुरुङले लिएका थिए । नुक्कली मोही खडा गरेर गुरुङले नै सबैभन्दा बढी जग्गा आफन्त र नातागोता मात्रै होइन विभिन्न व्यापारीलाई बेचेका थिए ।
उनले व्यक्तिगत, संयुक्त, भाटभटेनी सुपरमार्केट र आफन्तका नाममा जग्गा खरिद गरेका थिए । कित्ता नम्बर ७४, १३७, ४१३ का जग्गाहरु गुरुङले आफ्नै नाममा लिएका थिए ।

गुरुङले भाटभटेनी डेभलपर्स प्रालिका नाममा १० कित्ता जग्गा राखेका छन् । कित्ता नम्बर १०, १२, १४, १७, ५७, ५८, ७९, ८१, ८२ र २८६ को जग्गा अहिले पनि भाटभटेनीको नाममा छ । बाँकी जग्गा छोरो कल्याण लगायतका आफन्तका नाममा राखिएको छ ।

०६० चैत २५ गते राज्यले मुआब्जा दिएर अधिग्रहण गरेको जग्गा खरिद गरेपछि शुरु भएको गुरुङको संलग्नता त्यसपछि भने क्रमशः निर्णायक भूमिकामा परिणत हुँदै गएको पूर्वसचिव शारदाप्रसाद त्रिताल समितिको ठहर थियो ।

 

गैरकानूनी तरिकाले राजकुलो, बाटो, पोखरीको जग्गालाई मोही कायम गर्ने अख्तियार दुरुपयोग अनुसन्धान आयोग, मालपोतमा परेका उजुरी निस्तेज पार्ने काम गुरुङले गरेको त्रिताल नेतृत्वको समितिको निष्कर्ष छ । उनै गुरुङको समलग्नतामा सरकारी जग्गा जोगाउन लागि परेका एक अधिवक्तालाई विनाकारण ३ महिना थुनामा राखिएको समेत खुलेको थियो ।

 

कित्ता नम्बर ८३ को ४३९.११ वर्ग मिटर जग्गा शोभाकान्त ढकाल, रामप्रसाद सुवेदी र गुरुङको नाममा दर्ता गरिएको थियो । उनीहरु तीनै जना व्यापारीक साझेदार समेत हुन् ।

बालुवाटारको जग्गा प्रकरणमा ढकालले राजनीतिक च्यानल मिलाउने, सुवेदीले कानूनी छिद्र पहिल्याउने र गुरुङले नजराना चढाउने रकम जोहो गर्ने गरेको समितिले पत्ता लगाएको थियो ।

एनआरएनको भवन ०७१ फागुन १५ गते शिलन्यास गरिएको थियो । जबकि एनआरएनले ०७२ जेठ १४ गते मात्रै जग्गा किन्यो । एनआरएनले जग्गा किनेको रकमको चेक मिनबहादुर गुरूङ र उनकी पत्निलाई दिएको जग्गा खरिदका लागि गठित समितिले पत्ता लगाएको थियो ।

स्थायी घर खोटाङ भएका ६२ वर्षीय मीनबहादुर गुरुङ ०४१ सालमा नेपाल बैंकमा जागिर गर्थे । जागिरे छँदै श्रीमतीको गहना बेचेर भाटभटेनी कोल्ड स्टोर शुरु गरे । ०५१ सालसम्म पनि उनी जागिरमै थिए ।

१२० वर्ग मिटरको एउटा सटरबाट शुरु भएको उनको व्यवसाय अहिले एक लाख वर्ग मिटरमा फैलिएको छ ।

बालुवाटारको सयौं रोपनी सरकारी जमिन ब्यक्तिका नाममा गराउन आर्थिक लगानी गर्ने, योजना बनाउने र त्यसको लाभ लिनेमा मिनबहादुर नै पहिलो नम्बरमा रहेको उनीसँग कारोबारमा संलग्नहरु बताउँछन् ।

ब्यापारिक घरानालाई जग्गा बेच्ने प्रपञ्च मिलाउने पनि मिनबहादुर नै भएको र अधिकांश क्रेताले मिनबहादुरकै बिश्वासमा जग्गा किनेको उनीहरुले अनौपचारिक कुराकानीमा स्वीकारेका छन् ।

गुरुङले नै कालोधनको शंकाष्पद कारोबारी सुहृदराज घिमिरेलाई समेत बालुवाटारको १३ आना जग्गा बेचेका थिए । घिमिरले उक्त जग्गा सासु इन्दु शर्मा र साझेदार पुरुषोत्तम पौड्यालको नाममा राखेका छन् ।

सिआइबी उच्च स्रोतका अनुसार बालुवाटारको सरकारी जग्गा आफ्नो नाममा बनाउने सबैलाई प्रतिवादी बनाएर मुद्दा दायर गर्ने तयारी छ ।

सम्बन्धित खबर