काठमाडौँ, जेठ १२ । ललितपुरको लगनखेलमा बम भेटिएको छ । आइतबार साँझ आठ बजे लगनखेल बसपार्क नजिकै भेटिएको बम विस्फोट हुन नपाउँदै डिस्पोज गरिएको हो ।
बम भेटिने वित्तिकै नेपाली सेनाको बम डिफ्युजन टोली त्यहाँ पुगेको हुनाले ठुलो घटना हुन नपाएको लगनखेलबाट अमिर खरेलले दियोपोस्टसंग बताएका छन् ।
त्यस्तै ग्वार्कोमा पनि बम भेटिएको भन्ने खबर पाएपछि डिफ्युजन टोली ग्वार्कोतर्फ लागेको छ । भोलीको नेपाल बन्द सफल पार्नका लागि नेत्रविक्रम चन्द ‘विप्लव’ समुहले राजधानीमा बम आतंक मच्चाएको प्रहरीले जनाएको छ ।
प्रहरी प्रवक्ता विश्वराज पोखरेलका अनुसार राजधानीको अनामनगर र सुकेधारामा विप्लव समुहले बम विस्फोट गराएको पुष्टि भएको बताएका छन् ।
विस्फोटस्थलबाट दुई जना विप्लव कार्यकर्ता समेत घाइते अवस्थामा पक्राउ परेको र घटनास्थलमा पर्चाहरु भेटिएको कारण बम विस्फोटमा विप्लवको संलग्नता पुस्टि भएको हो ।
दुई स्थानमा भएको बम विस्फोटमा तीन जनाको मृत्यु भइसकेको छ । अन्य स्थानहरुमा त्यस्ता खालका दुर्घटनाहरु हुन नदिनका लागि सुरक्षाब्यवस्थालाई कडा बनाइएको प्रहरी प्रबक्ता पोखरेलले बताएका छन् ।
