
काठमाडौँ, चैत २६ । कोरोनाको त्रासमा कालोबजारी गर्ने शंकर ग्रुपका संचालक सुलभ अग्रवाललाई थप ७ दिन थुनामा राखेर अनुसन्धान गर्न अदालतले अनुमती दिएको छ । बुधबार जिल्ला अदालत काठमाडौँले अग्रवाललाई ७ दिन हिरासतमा राखेर अनु्सन्धान गर्न अनुमती दिएको हो ।
महानगरिय अपराध महाशाखाको टोलीले अग्रवाललाई मंगलबार राजधानीको नक्सालबाट पक्राउ गरेको थियो । उनले कुटनीतिक नियोगको गाडी प्रयोग गरेर थर्मल गनको कालोबजारी गरेको अरोप छ । मंगलबार उनको गाडीबाट ६७ थान थर्मल गन बरामद गरेको थियो ।
महानगरिय अपराध महाशाखाका अनुसार अग्रवालले ३५ सय पर्ने थर्मल गनलाई २५ हजारमा बिक्री गरेको जनाएको छ । पक्राउ परेका अग्रवाललाई जिल्ला अदालत काठमाडौंले थप सात दिन हिरासतमा राखेर अनुसन्धान गर्न म्याद थप गरेको महानगरीय प्रहरी परिसर काठमाडौंले जनाएको छ ।