काठमाडौँ । राजधानीको बानेश्वर क्षेत्रमा ड्युटीमा खटिएका प्रहरी कर्मचारीमाथि अभद्र व्यवहार तथा हातपात गरेको आरोपमा एक युवक पक्राउ परेका छन् । व्यस्त समय (पिक आवर) मा आकाशे पुल प्रयोग गर्न आग्रह गर्दा प्रहरीसँग विवाद झिकेर हातपातमा उत्रिएका ती युवकलाई प्रहरीले नियन्त्रणमा लिएको हो ।
जिल्ला प्रहरी परिसर काठमाडौंले जारी गरेको प्रेस विज्ञप्तिअनुसार गत भदौ ९ गते बिहान अन्दाजी ९:३० बजे बानेश्वरबाट थापागाउँ जाने सडक खण्डमा रहेको आकाशे पुलमुनि उक्त घटना घटेको हो । व्यस्त समयमा सडकमा ड्युटीमा खटिएका प्रहरी कर्मचारीले सडक जथाभाबी काट्न रोक लगाउँदै आकाशे पुलबाट बाटो काट्नका लागि सम्झाई-बुझाई गरेका थिए। तर, प्रहरीको आग्रहलाई अटेर गर्दै ती युवकले उल्टै ड्युटीमा खटिएका प्रहरी कर्मचारीलाई गालीगलौज तथा हातपात गरेका थिए ।
उक्त घटनामा संलग्न रहेको आरोपमा जिल्ला जुम्लाको तातोपानी गाउँपालिका-२ घर भई हाल काठमाडौं महानगरपालिका-३१ बस्ने २७ वर्षीय राज कठायत पक्राउ परेका छन् । प्रहरीलाई अभद्र व्यवहार गर्ने कठायतलाई नियन्त्रणमा लिई ‘राष्ट्रसेवकलाई बाधा विरोध गर्न नहुने र अभद्र व्यवहार गर्न नहुने’ कसुरमा जिल्ला प्रशासन कार्यालयबाट ५ (पाँच) दिनको म्याद थप अनुमति लिइएको छ । यस सम्बन्धमा प्रहरी वृत्त नयाँ बानेश्वरबाट थप अनुसन्धान भइरहेको जिल्ला प्रहरी परिसर काठमाडौंका प्रवक्ता तथा सूचना अधिकारी एवम् प्रहरी उपरीक्षक दान बहादुर थापाले जानकारी दिएका छन् ।
