प्रधानमन्त्री केपी ओलीलाई मेडिसिटि अस्पतालले भारतीय ‘कठपूतली’ बनाएपछि…..

काठमाडौं, १५ चैत्र । बुधबार राजधानीमा रहेको ५ तारे होटल सोल्टी क्राउन प्लाजामा भव्य कार्यक्रम थियो । अर्बपति व्यापारी उपेन्द्र महतोको लगानीमा ललितपुरको भैँसेपाटीमा सञ्चालित नेपाल मेडिसिटी अस्पताललाई एक भारतीय संस्थाले प्रदान गर्ने सर्टिफिकेटका लिनका लागि प्रधानमन्त्री केपी शर्मा ओली, उपप्रधान तथा स्वास्थ्य मन्त्री उपेन्द्र यादव सहित केही मन्त्रीहरु कार्यक्रममा पुगेका थिए ।

प्रधानमन्त्री केपी शर्मा ओलीले सम्बोधनका क्रममा मेडिसिटी अस्पताललाई ‘अन्तर्राष्ट्रिय स्तरको सेवा सुविधाका हिसाबले मान्यता प्राप्त गरेको छ’ भन्दै तारिफ गरिदिए । मेडिसिटीलाई सर्टिफिकेट दिने संस्था प्रधानमन्त्रीले भने जस्तो अन्तर्राष्ट्रिय स्तरको थिएन । त्यो संस्था त भारतीय अस्पताललाई सर्टिफिकेट प्रदान गर्ने भारतकै नेश्नल एक्रिडिटेशन बोर्ड फर हस्पिटल्स एण्ड हेल्थ केयर प्रोभाइडर्स (एनएबिएच) थियो ।

केही सञ्चारमाध्यमहरुले मेडिसिटि इतिहासले ‘इतिहास रच्यो’ भन्दै प्रचार गरेपनि वास्तवमा मेडिसिटि अस्पतालले नेपाललाई भारतकै एउटा प्रान्त र हाम्रा प्रधानमन्त्रीलाई प्रान्तको मुख्य मन्त्रीको हैसियतमा दुरुपयोग गरेको पाइएको छ । किन भने प्रधानमन्त्रीलाई उपस्थित गराएर पाँचतारे होटलमा सर्टिफिकेट प्रदान गर्ने उक्त बोर्डले भारतको अस्पताललाई मात्रै यस्तो सर्टिफिकेट प्रदान गर्दै आएको छ । उक्त बोर्डको वेभसाइटमै भारतका अस्पताललाई सेवा, सुविधा र स्वास्थ्य सेवा गुणस्तरको आधारमामा सर्टिफिकेट प्रदान गर्ने जनाएको छ ।

अस्पतालले ‘नेपाल मेडिसिटी अस्पतालले नेपालको पहिलो र एकमात्र नेशनल एक्रिडिटेसन बोर्ड फर हस्पिटल हेल्थ केयर प्रोभाइडर्स (एनएविएच)मान्यता प्राप्त गरी इतिहास रच्न सफल भएको र यो मान्यता प्राप्त भएसँगै मेडिसिटी अस्पताल विश्वस्तरीय अस्पतालको सूचीमा सूचीकृत भएको’ भन्दै दुष्प्रचार गराउँदै आएको छ । तर, वास्तवमा भने त्यस्तो होइन ।

नेशनल एक्रिडिटेसन बोर्ड फर हस्पिटल हेल्थ केयर प्रोभाइडर्स (एनएविएच) भारतीय अस्पताललाई एक्रिडिटेशन गर्ने बोर्ड हो ।

सन् २००६ देखि यो बोर्डले भारतीय अस्पतालहरुलाई यस्तो सर्टिफिकेट प्रदान गर्दै आएको छ । दियोपोस्टलाई प्राप्त ५९२ अस्पतालको सुचीमा मेडिसिटि अस्पतालको नाम भने छैन । तर, हाम्रा प्रधानमन्त्री केपी शर्मा ओली र उपप्रधान तथा स्वास्थ्य मन्त्री नै सहभागी भएको कार्यक्रमले प्रधानमन्त्रीकै गरिमा घटाएको विश्लेषण भइरहेको छ ।

भारतका १७ हजार अस्पताल मध्ये ५९२ अस्पताल मात्रै यो वोर्डमा सुचिकृत छन् ।

समाराहमा महतोलाई एनएविएचका कार्यकारी निर्देशक चिकित्सक हरिस नडकर्नीले एनएविएचको प्रमाणपत्र हस्तान्तरण गरेका थिए । तर उनै नडकर्नीले एनबिएचको वेभसाइटमा भारत राष्ट्र भित्रका अस्पतालको सेवा, जनशक्ति व्यवस्थापन, प्रविधि, बिरामी मैत्री पूर्वाधार तथा मापदण्डका आधारमा एनबिएचको बोर्डमा सुचिकरण गर्ने जनाएका छन् ।

नेपालमा सञ्चालित अस्पतालमा भारतीय बोर्डले किन सर्टिफिकेट दियो त्यो भने रहस्यको विषय बनेको छ ।

प्रधानमन्त्री केपी शर्मा ओलीकै सहभागीतामा भएको कार्यक्रमले नेपालमा भारतको कतिसम्म हस्तक्षेप रहेछ भन्ने समेत प्रष्ट भएको छ । कतिपय राजनीतिक कार्यकर्ताले प्रधानमन्त्रीलाई मेडिसिटि अस्पतालले भारतीय कटपुतली बनाएको समेत भनेका छन् ।

नेशनल एक्रिडिटेसन बोर्ड फर हस्पिटल हेल्थ केयर प्रोभाइडर्स (एनएविएच)मान्यता प्राप्त गर्ने ५९२ भारतीय अस्पतालकाे सुची तल हेर्नुहाेस् । जसमा मेडिसिटि अस्पतालकाे नाम उल्लेख छैन ।