काठमाडौँ । कैलालीस्थित जिल्ला कारागारमा थुनामा रहेका डडेलधुराका कैदीबन्दीको मृत्यु भएको भन्दै डडेलधुरा बजार बन्द गरिएको छ । भागेश्वर गाउँपालिका–५ निवासी २८ वर्षीय हरिश सिंह पालीको सोमबार सेती प्रादेशिक अस्पताल, धनगढीमा उपचारको क्रममा मृत्यु भए पछि डडेलधुरा बजार बन्दसहितको आन्दोलन सुरु गरिएको हो ।
मृत्यु प्रकरणको निष्पक्ष छानबिन गर्न माग गर्दै उद्योग वाणिज्य संघ डडेलधुराको नेतृत्वमा बजार बन्दसहितको आन्दोलन सुरु गरिएको बताइएको छ । बैंकिङ कसुरमा दोषी ठहर भई कारागारमा कैद सजाय भोगिरहेका पाली असार २ गते बिहान अचानक बिरामी परेपछि उपचारका लागि अस्पताल लगिएको थियो। तर, उपचारकै क्रममा उनको मृत्यु भएको कैलालीका प्रहरी नायब उपरीक्षक तथा प्रवक्ता राजकुमार सिंहले जानकारी दिए।
प्रहरीका अनुसार पालीलाई बिहान ११ बजे अस्पताल भर्ना गरिएको थियो। उपचारका क्रममा उनको मृत्यु भएको प्रहरीको भनाई छ । मृतकको शव अस्पतालकै शव गृहमा राखिएको र घटनाको अनुसन्धान भइरहेको प्रहरीले जनाएको छ।
उता, पालीको मृत्युप्रति असन्तुष्टि जनाउँदै डडेलधुरा बजारमा मंगलबार बिहानैदेखि यातायात, व्यापार र अन्य सम्पूर्ण सेवा बन्द गरिएको छ। उद्योग वाणिज्य संघ डडेलधुराको अगुवाइमा स्थानीयले निष्पक्ष छानबिन र पीडित परिवारलाई न्यायको माग गर्दै सडक आन्दोलन सुरु गरेका छन्।
संघले मृत्युलाई शंकास्पद भन्दै सत्यतथ्य बाहिर ल्याउन माग गरेको छ। आन्दोलन जारी रहने जनाउँदै संघले दोषीमाथि कडा कारबाहीको माग समेत अघि सारेको छ।
