कञ्चनपुरका पत्रकार खेम भण्डारी पक्राउको हल्ला ! के हो वास्तविकता ?

काठमाडौँ, भदौ १२ । सामाजिक सञ्जालमा एउटा समुहले कञ्चनपुरबाट प्रकाशित हुने दैनिक पत्रिका मानसखण्डका प्रकाशक खेम भण्डारी पक्राउ परेको खबर भाइरल बनाइरहेका छन् । तर २ वर्षअघि असारमा पक्राउ परेका भण्डारी बारेको उक्त समाचार अहिले पोस्ट गरेर एक अनलाईनले उनको चरित्र हत्या नै गरिरहेको पाइएको छ ।

केही दिनअघि नेकपाका अध्यक्ष पुष्पकमल दाहालको विषयमा पनि यस्तै खबर भाइरल बनेको थियो । ३३ दलिय मोर्चाको अध्यक्ष रहेका बखत संविधान जारी हुनुअघि भएको आन्दोलनको भिडियो प्रकाशन गरेर प्रचण्डको दुष्प्रचार गरिएको थियो ।

ब्राइटखबर्स डटकम नामक एक अनलाईन न्यूज पोर्टलले व्यक्तिको चरित्र हत्या गर्न र सर्वसाधारणमाझ भ्रम फैलाउनको लागि भण्डारी पक्राउको समाचार प्रकाशन गरेको छ । ‘पत्रकार खेम भण्डारी पक्राउ शीर्षक लेखेर उक्त अनलाईन पोर्टलले २ बर्षअघिको समाचारलाई पुन प्रकाशन गरेको हो ।

युट्युब देखि फेसबुकसम्म भ्रमको खेति

अनलाईन पोर्टलले समाचारलाई पुन प्रकाशन गरेलगत्तै एक युट्युव च्यानलले समेत भिडियो सार्वजनिक गरेको छ । ट्रुजिना इन्टरटेनमेन्ट नाम गरिएको उक्त युट्युव च्यानलले खेम भण्डारी पक्राउ परेको बताउँदै उनले पेसागत मर्यादा भुलेको र संचारजगत्लाई नै कालो दाग लगाएको सम्म आरोप लगाएको छ ।

अनलाईन र युट्युवमा सार्वजनिक भएको उक्त भिडियोे फेसबुक र ट्वीटरजस्ता सामाजिक संजालमा भाइरल भएका छन् । विशेष गरि रावि लामिछानेका समर्थकहरुले उक्त भिडियो र समाचारलाई भाइरल बनाएका छन् ।

के हो वास्तविकता ?

खेम भण्डारी प्रकाशक रहेको मानसखण्डले २०७४ को असारमा एक समाचार प्रकाशन गरेको थियो । सो समाचारमा बसपार्क क्षेत्रमा होटल व्यवसाय गर्दै आएका दुई युवतीलाई प्रहरीले नियन्त्रणमा लिएको उल्लेख भएको थियो । तात्कालिन प्रहरी प्रमुख रहेका एसपी प्रकाश बहादुर चन्दको निर्देशनमा युवतीहरुलाई अपहरण शैलीमा लगिएको भन्दै मानसखण्ड दैनिकमा युवतीहरुको नामसहित प्रकाशन गरेका थिए ।

युवतीको नाम अखवारमा प्रकाशन गरेर व्यक्तिको चरित्र हत्या भएको भन्दै अविभावकहरुले भण्डारी विरुद्ध उजुरी दिएका थिए । सोही उजुरीका आधारमा भण्डारीलाई पक्राउ गर्न जिल्ला प्रहरी कार्यलयका प्रहरी नायव निरिक्षक महेन्द्र पाण्डेको नेतृत्वमा टोली खटाइएको थियो । उक्त टोलीले उनलाई मानसखण्डको कार्यलयबाटै पक्राउ गरेको थियो ।

रवि लामिछाने प्रकरण

पछिल्लो समय न्यूज २४ टेलिभिजनका कार्यक्रम प्रस्तोता रवि लामिछाने र पत्रकार खेम भण्डारीबिच द्वन्द नै चलिरहेको छ । भण्डारीले रविविरुद्ध प्रेस काउन्सिलमा उजुरी दिएपछि उनिहरुको द्वन्द सतहमै आएको छ । भण्डारीको चरित्र हत्या गर्नमा रवि लामिछानेको समर्थकहरु सामाजिक संजालमा पनि सक्रिय भएर लागेको पाइन्छ ।

ब्राइट्सखबर नाम गरिएको उक्त वेभ साइट भर्खरै मात्र डिजाइन भएको आभास हुन्छ । उक्त साइटमा अन्य कुनै समाचार छैन । सबै भण्डारीको एउटै मात्रै समाचार छ ।