कर्णाली सरकार र विज्ञ समूहबीच परामर्श बैठक: बजेट कार्यन्वयनको विषयमा छलफल

diyopost.com
Diyo post  बुधबार, आश्विन २४, २०७५ | २०:३३:५१

सुर्खेत, २४ असोज । कर्णाली प्रदेश सरकार र यसअन्तर्गत गठित विज्ञ समूहबीच आज परामर्श बैैठक भएको छ ।

मुख्यमन्त्री तथा मन्त्रिपरिषद्को कार्यालयमा मुख्यमन्त्री महेन्द्रबहादुर शाहीको अध्यक्षतामा बसेको परामर्श बैठक बजेट कार्यान्वयनमा केन्द्रित भएको हो ।

बैठकमा विज्ञ समूहका संयोजक जनार्दन शर्मा, सदस्य डा पुण्य रेग्मी, डा सुरेश तिवारी, डा कुशेन्द्र महत, डा कृष्णप्रसाद पौडेल, पूर्वमहान्यायधिवक्ता मुक्ति प्रधानले समूहको हालसम्मको प्रगति प्रतिवेदन प्रस्तुत गरेका थिए ।

बैठकमा प्रतिवेदन प्रस्तुत गर्दै पूर्वगृहमन्त्रीसमेत रहेका समूहका संयोजक शर्माले भने, “जनतालाई परिणाम चाहिएको छ । कानूनी अड्चनलाई सल्टाएर बजेट कार्यान्वयनमा सरकारले तदरुकता देखाउनुपर्दछ ।” जनतालाई सरकारी प्रक्रियाको सरोकार नहुने भन्दै उहाँले सरकारलाई परिणाममुखी बनाउन सुझाएका छन् ।

बजेट कार्यान्वयनका निम्ति आवश्यक संयन्त्र एवं कानून निर्माण गरी कर्णालीको विकासमा प्रभावकारिता ल्याउन चालू आवमै ठूला परियोजनाको विस्तृत प्रतिवेदन तयार गर्न जोड दिँदै समूहले प्रदेश सरकारलाई सक्दो सहयोग गर्ने उहाँको भनाइ थियो । उहाँले प्रदेश सरकारको नीति, बजेट तथा कार्यक्रम कार्यान्वयनमा सहज वातावरण बनाउन कर्मचारी प्रशासनलाई आग्रह गरेका छन् ।

खासगरी चालू आवको बजेट कार्यान्वयनका चुनौती, समाधानका उपाय र तत्काल प्रदेश सरकारले निर्माण गर्नुपर्ने कानूनलगायत विषयमा विज्ञले प्रदेश सरकारलाई सुझाव दिएको सरकारका प्रवक्ता एवं भूमि व्यवस्था तथा कृषि सहकारीमन्त्री विमला केसीले जानकारी दिएकी छिन् ।

विज्ञ समूहका सदस्य र प्रदेश सरकारबीच बिहीबार पुन ः संयुक्त बैठक बस्ने जनाइएको छ । बैठकमा प्रदेश सरकारका मन्त्रीहरु प्रकाश ज्वाला, नरेश भण्डारी, बिमला केसी, दल रावल, खड्कबहादुर खत्री, नन्दसिंह बुढा, प्रमुख सचिव रामप्रसाद थपलियासहित प्रदेश सरकारका विभागीय मन्त्रालयका सचिवको सहभागिता रहेको थियो ।

सम्बन्धित खबर