काठमाडौँ, कात्तिक ४ । राजधानी भित्रिने मुख्य नाकाका रूपमा रहेको नागढुङ्गा–सिस्नेखोला सुरुङमार्ग सोमबार शिलान्यास हुने भएको छ । सडक विभागका प्रवक्ता शिवहरि सापकोटाका अनुसार प्रधानमन्त्री केपी शर्मा ओलीले आज सोमबार अपराह्न चन्द्रागिरि नगरपालिका–१ टोटेपाखामा सुरुङमार्ग शिलान्यास गर्ने कार्यक्रम तय भएको छ ।
सो अवसरमा भौतिक पूर्वाधार तथा यातायातमन्त्री रघुवीर महासेठ, नेपालका लागि जापानी राजदूत, जाइकाका प्रतिनिधि लगायत सहभागि रहनेछ । जापानी अन्तर्राष्ट्रिय सहयोग नियोग जाइकाको सहुलियत ऋण सहयोगमा सो सुरुङमार्गको निर्माण हुन लागेको हो ।
करिब २२ अर्ब रुपियाँको लगानीमा निर्माण हुन लागेको सो सुरुङमार्गमा जाइकाले १६ अर्ब रुपियाँ सहयोग गर्नेछ भने छ अर्ब रुपियाँ नेपाल सरकारले आन्तरिक स्रोतबाट बेहोर्ने छ । प्रवेश मार्गसहित ५।५६ किमी सुरुङ मार्ग निर्माणले नेपालको पूर्वाधार विकासमा महìवपूर्ण योगदान पुग्ने विश्वास गरिएको छ ।
