एकसय आठ साधुलाई सामूहिक भोजन

एकसय आठ साधुलाई सामूहिक भोजन

कञ्चनपुर, १९ फागुन । कञ्चनपुरको झलारी पिपलाडी नगरपालिका–११, कलुवापुरमा रहेको रामजानकी मन्दिरमा मङ्गलबार १०८ साधुलाई सामूहिक भोजन गराइएको छ ।

मन्दिर व्यवस्थापन समितिका अध्यक्ष शिवशङ्कर नाथले भण्डाराको आयोजना गरी सामूहिक भोज गरेका हुन्।

हिन्दू धर्मको प्रचारप्रसारसँगै प्राचीनतम् रामजानकी मन्दिरको बारेमा जानकारी दिने उद्देश्यले सामूहिक भोजको आयोजना गरिएको अध्यक्ष नाथले बताए।

भोजमा कैलालीको गोदावरी, घोडाघोडी, धनगढी, कञ्चनपुरको विष्णुधाम, महेन्द्रनगर तथा भारतको राजस्थान र हिमाञ्चल प्रदेशका साधुहरुले सहभागिता जनाएका थिए। नाथले हिन्दू धर्म जागरणका लागि दुई वर्षअघि नवरात्रको अवसरमा नौ दिनसम्म छातीमा जमरा उमारेर प्रसिद्धि कमाएका थिए ।

विसं २०४२ मा बनेको रामजानकी मन्दिरमा ८४ वटा शिवलिङ्गसमेत रहेका छन् ।

रामजानकी मन्दिरको भौतिक संरचनाको संरक्षण र सम्वद्र्धनका लागि सरकारी तवरबाट कुनै पनि पहल हुन नसक्दा निर्माणाधीन यज्ञशाला बन्न नसकेको समाजसेवी दिलबहादुर बुढाले बताए ।

यो मन्दिर विवाह र व्रतबन्ध गर्नका लागि यस क्षेत्रमा प्रख्यात रहेको छ । यस मन्दिरमा गरिएको विवाह रामजानकी झैँ अटुट रहने जनआस्था रहेको छ । रासस

Trending News