बनेपा, २१ चैत । काभ्रेपलाञ्चोकमा एक श्रीमान्ले श्रीमतीको गएराति धारिलो हतियार प्रहार गरी हत्या गरेका छन् ।
जिल्लाको पनौती नगरपालिका वडा नं १३ स्थित पस्थलीका ३४ वर्षीय रामशरण थापाले २८ वर्षीया श्रीमती सम्झना थापाको हँसिया र बन्चरो प्रहार गरी हत्या गरेको जिल्ला प्रहरी कार्यालय, धुलिखेलका प्रहरी नायब उपरीक्षक नवीनराज राईले बताए ।
पहिले हँसियाले हानेको देखिन्छ र पछि बन्चरो प्रहार गरेको देखियो, घटनास्थलबाट फर्केका प्रहरी नायब उपरीक्षक राईले बताए ।
गएराति गाउँमा सप्ताह चलिरहेको मौकामा उनले श्रीमतीको हत्या गरेको र घटनाको जानकारी आज बिहानमात्रै प्रहरीलाई गाउँलेले दिएका थिए ।
सो घटनामा संलग्न थापा घरमा नै बसिरहेको अवस्थामा प्रहरीले पक्राउ गरेको छ । उनका दुई छोरा छन् ।
प्रहरीले घरायसी झगडाका कारण सो घटना भएको आशङ्का गर्दै अनुसन्धान जारी रहेको जनाएको छ ।
