काठमाडौँ, २२ चैत । विभिन्न सङ्घसंस्थाले खाडीका छ मुलुक र मलेसियामा वैदेशिक रोजगारीका लागि लागू गरिएको निःशुल्क प्रवेशाज्ञा र टिकटको व्यवस्था प्रभावकारी हुनुपर्ने माग गर्दै दबाबमूलक कार्यक्रम गरेका छन् ।
सुरक्षित आप्रवासनका लागि राष्ट्रिय सञ्जालको आयोजनामा आज सिंहदरबार क्षेत्रमा ‘फ्रि टिकट फ्रि भिसाको प्रभावकारी कार्यान्वयन हुनुपर्ने’ लेखिएको ब्यानर लिएर उनीहरुले धर्ना दिइरहेका छन् ।
म्यानपावर सञ्चालकको प्रभावमा परी कामदारको पक्षमा रहेको निःशुल्कको निर्णयबाट सरकार पछि हट्न नहुने भन्दै सचेत गराउन उनीहरु धर्नामा बसेका हुन् ।
सञ्जालका अध्यक्ष सिद्धिचन्द्र बरालले दबाबमूलक कार्यक्रमअन्तर्गत एक साता ९ देखि १० बजेसम्म राजधानीका विभिन्न स्थानमा निःशुल्कको प्रभावकारी कार्यान्वयनको माग गर्दै धर्ना दिने निर्णय गरेको जानकारी दिए ।
सरकारले कतार, दुबई, ओमान, कुबेत, साउदी अरब, बहराइन, मलेसियामा निःशुल्क निर्णय गर्दै गन्तव्य मुलुकले सेवा शुल्कबापत रकम नदिएको अवस्थामा मात्रै म्यानपावरले कामदारबाट रु १० हजार लिन पाउने व्यवस्था गरेको छ ।
