कालोबजारी अन्त्य गर्न विद्यार्थीको माग
भक्तपुर, २३ चैत । पेट्रोलियम पदार्थमा भएको कालोबजारीको विरोध गर्दै यहाँ आज विभिन्न विद्यार्थी सङ्गठनले पदयात्रा गरेका छन् ।
अनेरास्ववियु, नेविसङ्घ र नेक्राविसङ्घले संयुक्त रुपमा आज पदयात्रा गर्दै जिल्ला प्रशासन कार्यालयमा धर्नासमेत दिए ।
विद्यार्थी सङ्गठनले प्रजिअ तेजप्रसाद पौडेललाई बजार अनुगमन प्रभावकारी गर्न र कालोबजारी अन्त्य गरी सर्वसाधारणको जनजीवन सहज बनाउनका लागि पहल गर्न माग गर्दै ज्ञापनपत्र बुझाए ।
ज्ञापनपत्र बुझ्दै पौडेलले बजारमा कालोबजारी र भ्रष्टाचारीलाई अन्त्य गर्न आफूले सक्दो प्रयास गर्ने प्रतिबद्धता व्यक्त गरे ।
नेपाल सरकारको सम्बन्धित निकायले समेत उदासीनता देखाउँदा कालोबजारी गर्नेलाई फाइदा पुगेको र जनता मर्कामा परेको अनेरास्ववियुका संयोजक जयराम बाँस्तोलाले बताए ।
बजार अनुगमन र कालोबजारी नियन्त्रणमा सरकारी निकायले आवश्यक कदम नचालेमा कडा आन्दोलन गरिने चेतावनी नेविसङ्घका उद्धव खड्काले बताए।
दैनिक रुपमा पाँच लाख किलोलिटर पेट्रोलियम पदार्थ आयात हुँदा समेत जनताले सहज तरिकाले पाउन नसक्ने अवस्थाको अन्त्य गर्न सरकारले कडाइ गर्नुपर्नेमा नेक्राविसङ्घका रमेश प्रजापतिले जोड दिए ।
