म्याग्दी , २५ चैत । जिल्ला विकास समितिको कार्यालय म्याग्दीले दोहोरो सुविधा दाबी गर्ने कर्मचारीलाई कडाइ गरेको छ ।
विषयगत कार्यालय, परियोजना र सङ्घसंस्थाको खर्चमा उनीहरुको कार्यक्रममा सहभागी हुन जाने कर्मचारीले कार्यालयबाट पनि भ्रमणभत्ताको दाबी गर्न थालेपछि कडाइ गरिएको हो ।
दोहोरो सुविधा लिने प्रवृत्तिलाई नियन्त्रण गर्न जिविसले आधिकारिक पत्रबिना आफ्ना कर्मचारीलाई कुनै पनि कार्यक्रममा सहभागी नगराउन पत्राचार गरेको छ ।
कार्यालयमा जानकारी नै नगराइकन एनजिओ, आइएनजिओ, विषयगत कार्यालयको कार्यक्रममा सहभागी हुन जाने, उनीहरुबाट सुविधा लिने र कार्यालयबाट पनि दैनिक भ्रमणभत्ता दाबी गर्ने प्रवृत्ति समस्याका रुपमा देखिएपछि नियन्त्रणका लागि बाध्य भएर पत्राचार गरेको स्थानीय विकास अधिकारी चिरञ्जिवी पौडेलले बता्ए ।
यसै महिनाको पहिलो हप्ता जिविसले म्याग्दीका सबै विषयगत कार्यालय, गैरसरकारी सङ्घसंस्था, परियोजनाहरुलाई कार्यालयको प्रतिनिधित्व गराउँदा पत्रमार्फत पूर्वजानकारी गराउन र आधिकारिक पत्रबिना कुनै पनि कर्मचारीलाई सहभागी नगराउन आग्रह गरेको छ । सङ्घसंस्था र विषयगत कार्यालयहरुले पनि कार्यालयलाई जानकारी नगराइकन आफूलाई मन परेको कर्मचारीलाई कार्यक्रममा सहभागी हुन बोलाउने गरेको देखिएको छ ।
कर्मचारीले विभिन्न बहना बनाएर कार्यालयमा नबस्दा प्राविधिक र प्रशासनिक, सेवा प्रवाह प्रभावित हुने, ढिलासुस्ती हुने तथा दोहोरो सुविधाका कारण राज्यको स्रोत दुरुपयोग भएको छ ।
कतिपय कर्मचारीले घरायसी काम र बिरामी भएको बहाना बनाएर एनजिओका कार्यक्रम, विषयगत कार्यालयको तालिम र बैठकमा सहभागी हुने गरेको स्थानीय विकास अधिकारी पौडेलले बताए । जिविसको यस्तो निर्णयपछि कर्मचारीहरु कार्यालयमै बसेर काम गर्ने वातावरण बन्न थालेको छ ।
