आत्मविश्वासका साथ पुनःनिर्माणलाई तीव्रता दिउँ ः प्रधानमन्त्री
काठमाडौँ, १३ वैशाख । प्रधानमन्त्री केपी शर्मा ओलीले आत्मविश्वासका साथ पुनःनिर्माण अभियानलाई तीव्रता दिन आग्रह गरे।
सम्पदा पुनःनिर्माण अभियानको प्रारम्भका क्रममा आज स्वयम्भूमा आयोजित कार्यक्रममा प्रधानमन्त्री ओलीले विनाशकारी भूकम्प गएको एक वर्ष बितेपनि पुनःनिर्माणले गति लिन नसकेको स्वीकार गर्दै अब तीव्रताका साथ काम हुने बताए ।
प्रधानमन्त्री ओलीले भन्नुभयो, ‘‘जनता अप्ठ्यारो र असुविधामा छन्, त्यसैले तीव्रताका साथ पुनःनिर्माण अभियान सञ्चालनका लागि मैले सम्बन्धित निकायलाई निर्देशन दिइसकेकोे छु । पुनःनिर्माण र देश विकास गर्न सक्छौँ भन्ने आत्मविश्वासका साथ हामी सबै जुटाँैं ।’’
उहाँले आठ लाख निजी घर भत्केको अवस्थामा सरकारले रकम दिए पनि तत्काल नयाँ घर बन्न नसक्ने भएकाले सामूहिक टहरा निर्माणको पनि योजना राखिएको बताए ।
प्रधानमन्त्री ओलीले कानुन तर्जुमाको ढिलाइले काममा तीव्रता नआएको उल्लेख गर्दै आइतबार १० भन्दा बढी जिल्लामा पुनः निर्माण सुरु भएकाले अब ढिलो नहुने विश्वास दिलाए ।
प्रधानमन्त्री ओलीले ऐतिहासिक कला, धर्म, संस्कृति हाम्रा आस्थाको धरोहरलाई बचाउन लगातार काम गर्न पनि आग्रह गरे ।
पुरातत्व विभागका महानिर्देशक भेषनारायण दाहालले स्वयम्भू क्षेत्रको पुनःनिर्माणका लागि रु एक करोड ७१ लाखको लागत अनुमान गरिएको जानकारी दिए । त्यहाँका पाँच सम्पदा, २४ पुजारीका घर पुनःनिर्माणका लागि सो बजेट अनुमान गरिएको हो ।
प्रताप मल्लले बनाएको अनन्तपुर, देवधर्म महाबिहार, टाँसीगोर्मा महाचैत्यलगायत सम्पदा क्षतिग्रस्त भएका थिए ।
स्वयम्भू व्यवस्थापन तथा संरक्षण महासमितिका अध्यक्ष सर्वज्ञरत्न तुलाधरले सरकारले सम्पदा पुनःनिर्माणलाई प्राथमिकता दिनुपर्ने बताए ।
विनाशकारी भूकम्पको प्रथम वार्षिकीका अवसरमा सरकारले काठमाडाँैं उपत्यकाका चार महत्वपूर्ण सम्पदास्थलमा प्रमुख दलका शीर्ष नेताको उपस्थितिमा पुनःनिर्माण कार्यको थाली गर्ने कार्यक्रम तय गरेको थियो ।
