एसियाली राष्ट्र युएईले विश्व क्रिकेटमा सनसनी मच्याएको छ ।
क्रिकेटको एसोसियट राष्ट्र युएईले टी २० मा बलियो टेस्ट टाेली न्युजिल्याण्डलाई पराजित गरेर सनसनी मच्याएको हो ।
युएई भ्रमणमा रहेको न्युजिल्याण्ड दोस्रो खेलमा युएईसँग ७ विकेटले पराजित भएको हो ।
पहिले ब्याटिङ गर्दै न्युजिल्याण्डले २० ओभरमा ८ विकेट क्षतिमा १४२ रन मात्रै बनाएको थियो । तर जवाफी सामान्य लक्ष्य युएईले १५.४ ओभरमै ३ विकेट गुमाएर पूरा गर्दै बलियो टोलीविरुद्ध सनसनीपूर्ण जीत निकालेको हो ।
पहिलो खेलमा पनि युएई जीतनजिक पुगेर १९ रनले पराजित हुन पुगेको थियो ।
बलियो टोलीविरुद्ध जीत निकाल्न युएईका लागि बलिङमा आयान खानले ३ र महम्मद जवादुल्लाहले २ विकेट लिए ।
ब्याटिङतर्फ कप्तान महम्मद वासिमले ५५ र आशिफ खानले २९ बलमा नटआउट ४८ रनको महत्वपूर्ण रन बनाउँदा टिम ऐतिहासिक जीत निकाल्न सफल भयाे ।
युएईको महत्वपूर्ण जीतसँगै सिरिजमा १–१ को बराबरी भएको छ । २० अगस्टमा निर्णायक अन्तिम खेल हुनेछ ।
