डिजिटल भुक्तानी निःशुल्क बनाउन रास्वपा सांसद डाँगीको माग
काठमाडौँ । डिजिटल कारोबारमा लाग्दै आएको चर्को शुल्क हटाएर निःशुल्क बनाउन रास्वपा सांसद निशा डाँगीले माग गरेकी छिन् । शुक्रबार प्रतिनिधिसभा बैठकमा उनले सरकारले विद्युतीय कारोबारलाई प्रोत्साहन गर्ने भने पनि व्यवहारमा त्यस्तो नदेखिएको भन्दै डिजिटल ट्रान्जेक्सन निःशुल्क बनाउन माग गरिन् ।
उनले भनिन्, ‘यदि सरकारले साँच्चै डिजिटल भुक्तानीलाई प्रोत्साहन गर्ने हो भने कर कटौती गर्दै निःशुल्क डिजिटल भुक्तानी प्रणालीको विकास गर्न आवश्यक छ।’
डिजिटल कारोबारलाई प्रोत्साहन गर्न सरकारले तत्काल कदम चाल्नुपर्ने माग गर्दै उनले थपिन्,‘म सभामुखमार्फत नेपाल सरकार र अर्थ मन्त्रालयलाई तत्कालै नीति परिवर्तन गरेर हुन्छ कि राष्ट्रिय भुक्तानीको प्रणाली स्थापना गरेर हुन्छ, हाल भएका पेमेन्ट गेटवेजलाई समेत मर्का नपर्ने गरी डिजिटल ट्रान्जेक्सन निःशुल्क बनाउन आजैबाट काम सुरु गर्न गम्भीर ध्यानाकर्षण गराउन चाहन्छु,’ ।
