हालसम्म ९८ भगौडा कैदी पक्राउ

diyopost.com
bestnp  बिहिबार, चैत्र २५, २०७२ | ७:५१:५७

मेलम्ची, २५ चैत । गत वैशाख १२ गतेको भूकम्पमा सिन्धुपाल्चोक जिल्लाबाट भागेका २१६ कैदीमध्ये हालसम्म ९८ जनामात्र प्रहरीले पक्राउ गरी जिल्ला कारागार सिन्धुपाल्चोकमा बुझाएको जिल्ला कारागार सिन्धुपाल्चोकका निमित्त कारागार प्रमुख आकाश अधिकारीले जानकारी दिनुभएको छ ।

पछिल्लो समय पक्राउ पर्नेमा जबर्जस्ती करणी गरेको आरोपमा भूकम्पपश्चात् कारगारबाट फरार भएका सिन्धुपाल्चोक जिल्ला धुस्कुन–१ का ३९ वर्षीय नकुल भन्ने गिरीबहादुर खत्री रहेको र उनी समेत अहिलेसम्म ९८ जनालाई प्रहरीले पक्राउ गरिसकेको अधिकारीले जानकारी दिनुभयो ।

कारागारमा २१६ कैदीबन्दी रहेको, जसमा १९६ पुरुष र २० महिला रहेको कारागारले जनाएको छ । भूकम्पपश्चात् फरार भएका कतिपय कैदी आफै सम्पर्कमा आएका थिए भने कतिपयलाई प्रहरीले पक्राउ गरेको थियो ।

भूकम्पपश्चात् कारागारसमेत भत्किएकाले कैदी राख्ने ठाउँसम्म नहँुदा धेरै समस्या भएको र समातिएका कैदीलाई विभागले तोके अनुुसारको ठाउँमा पठाउने गरेको निमित्त प्रमुख अधिकारीले बताए । भूकम्पले भत्किएको कारागार एक वर्ष हुनलाग्दा समेत निर्माण गर्ने तत्परता देखिएको छैन ।

अधिकारीका अनुसार भूकम्पपश्चात् दुई कारागार प्रमुखको सरुवा भइसकेको र अहिले जिल्ला कारागार प्रमुखविहीन भएको छ । भत्किएको कारागारको पुनःनिर्माणका लागि उचित स्थानको अभाव र सार्वजनिक जग्गाको अभावको कारणसमेत कारागार निर्माणमा समस्या भएको हो । भूकम्प गएको एक वर्ष पुग्नैलाग्दासमेत ११८ जना कैदीबन्दी अझै फरार छन् ।

सम्बन्धित खबर