पहिलो हाफमा गोलरहित बराबरीमा रोकिए नेपाल र बंगलादेश

दियोपोस्ट संवाददाता

काठमाडौं । साफ महिला च्याम्पियनसिप २०२४ अन्तर्गत उपाधि भिडन्तमा नेपाल र बंगलादेशले पहिलो हाफमा गोलरहित बराबरी खेलेका छन्।

त्रिपुरेश्वरस्थित दशरथ रंगशालामा पहिलो हाफमा दुवै गोल पाएको अवसरमा गोल गर्न असफल भए।

खेलको दोस्रो मिनेटमै बंगलादेशले गोल गर्ने सुन्दर अवसर सदुपयोग गर्न सकेन। नेपालकी डिफेन्डर गीता रानाले डिबक्स नजिक मिस पास दिएपछि पाएको बलमा बंगलादेशकी कप्तान सविना खातुनले सशक्त प्रहार गरेकी थिइन्। तर उनको प्रहार बारमा लागेर फर्किएको थियो। त्यसपछि सविना गरेको हेडरलाई नेपाली गोलकिपर एन्जिला तुम्बापो सुब्बाले नियन्त्रणमा लिइन्।

खेलको दशौं मिनेटमा नेपालले अग्रता लिने अवसर गुमायो। बंगलादेशकी गोलकिपर रुप्ना चक्मा अघि बढेको अवस्थामा नेपालकी अमिषा कार्कीले डिबक्समा गोल गर्ने अवसर पाइन्। तर उनको प्रहार बारमा लागेर फर्किएको थियो।

सन् २०१० देखि सुरु भएको यस प्रतियोगितामा नेपालले पाँच पटक फाइनलमा पुगेर पनि उपाधि जित्न सकेको छैन। यस पटक भने घरेलु मैदानमा भारतलाई पराजित गर्दै फाइनलमा पुगेको नेपाली टोलीसँग इतिहास रच्ने सुनौलो अवसर छ।

मुख्य प्रशिक्षक राजेन्द्र तामाङले विगतका अनुभवबाट सिक्दै यस पटक उपाधि जित्ने रणनीति बनाएको बताए। नेपालले यसअघि चार पटक भारतसँग र एक पटक बङ्गलादेशसँग फाइनल गुमाएको थियो।

टोलीकी स्टार खेलाडी सावित्री भण्डारी (साम्बा) ले यस प्रतियोगितामा नयाँ कीर्तिमान बनाउने मौका पाउने छिन्। उनले सेमिफाइनलमा गोल गर्दै साफ च्याम्पियनसिपमा अनु लामाको २१ गोलको कीर्तिमान बराबरी गरिसकेकी छिन्। फ्रान्सको क्लब इए अभान्ट गुइग्याम्पबाट फर्किएकी साम्बाले नेपालका लागि ४८ खेलमा ५५ गोल गरिसकेकी छिन्।

कप्तान अन्जिला तुम्बापो सुब्बाले गत संस्करणमा बङ्गलादेशसँग भएको हारको बदला लिने लक्ष्य राखेको बताइन्। सन् २०२२ मा बङ्गलादेशले नेपाललाई ३-१ ले हराउँदै आफ्नो पहिलो साफ उपाधि जितेको थियो।

यस संस्करणमा नेपालले समूह चरणमा माल्दिभ्सलाई ११-० र श्रीलंकालाई ६-० ले पराजित गरेको थियो। बङ्गलादेशले पाकिस्तानसँग १-१ को बराबरी खेल्दै भारतलाई ३-१ ले हराएर फाइनल यात्रा तय गरेको हो।

फाइनल खेल आज साँझ साढे ६ बजे दशरथ रंगशालामा हुनेछ, जहाँ घरेलु दर्शकको समर्थनमा नेपालले पहिलो पटक साफ महिला च्याम्पियनसिपको उपाधि जित्ने आशा गरेको छ।