पर्वत, २१ चैत । पछिल्लो समय लोप हुँदै जान लागेका पञ्चेबाजा संरक्षण अभियानमा पर्वतका सांसदहरुले सक्रियता देखाएका छन् ।
जिल्लामा पछिल्लो समय लोप हुन थालेका पञ्चेबाजा संरक्षणमा पर्वतका सांसदहरुले सांसद विकास कोषको रकमबाट रकम विनियोजन गरेका छन् । पर्वतका सांसदहरु अर्जुनप्रसाद जोशी, विकास लम्साल र कल्पना चापागार्इंले बाजा संरक्षणकै लागि चालु आवमा रु पाँच लाख विनियोजन गरेका हुन् ।
बाजा संरक्षणका लागि सांसद विकास कोषबाट अर्जुनप्रसाद जोशीले रु दुई लाख विनियोजन गर्नुभएको छ भने अर्का सांसद विकास लम्सालले पनि रु दुई लाख रकम छुट्याउनुभएको छ । त्यसैगरी समानुपातिकतर्फकी सांसद कल्पना चापागार्इंले संस्कृतिका लागि बाजा खरिदका लागि रु एक लाख विनियोजन गर्नुभएको हो । पर्वत जिल्लामा झन्डै १३ प्रतिशतभन्दा बढी दलित समुदायको बाहुल्यता रहेको छ ।
जिल्लाका अधिकांश गाउँमा दलित समुदायले पञ्चेबाजा बजाउने गर्छन्, यद्यपि पछिल्लो समय मगर समुदाय माझ पनि पञ्चेबाजाले स्थान पाउन थालेको छ । बनौ र सालिजाका मगर समुदाय समेत पञ्चेबाजालाई संस्कृतिसंँग जोडेर संरक्षण अभियानमा लागेका छन् । हराउँदै गएको संस्कृतिका रुपमा रहेको पञ्चेबाजालाई संरक्षणका लागि सांसदहरुको सक्रियताका कारण बाजा संरक्षणमा थप टेवा पुग्न सक्ने विश्वासले बाजा संरक्षणमा सहयोग गरिएको सांसद चापागार्इंले बताए ।
पञ्चेबाजा विशेषगरी नेपाली समुदायमा खुसियाली मनाउने बेलामा बजाउने गरिन्छ । विवाह, व्रतबन्ध, पास्नी वा विशेष प्रकारका पार्टीमा बजाउने नेपाली लोकसंस्कृतिसँंग जोडिएको बाजाको संरक्षणका लागि यसअघि विभिन्न गैरसरकारी संस्थाले सहयोग गर्दै आइरहेका थिए ।
