म्याग्दी, २२ चैत । म्याग्दीका पुस्तक व्यवसायीले आगामी नयाँ शैक्षिक सत्रमा विद्यार्थीलाई आवश्यक पर्ने पाठ्यपुस्तक ढुवानी सुरु गरेका छन् ।
सदरमुकाम बेनीका पुस्तक व्यवसायीले भौगोलिक रुपमा विकट र दुर्गम क्षेत्रका विद्यालयमा नयाँ शैक्षिक सत्रअगावै पाठ्यपुस्तक पुराउने उद्देश्यले ढुवानी सुरु गरेका हुन् ।
जिल्लामा भित्रिएको पाठ्यपुस्तक पहिलो चरणमा कुइनेमङ्गले, गुर्जा, मुदी, मुना, मल्कवाङलगायत दुर्गम क्षेत्रका विद्यालयलाई प्राथमिकता दिएर ढुवानी गरिएको नेपाल पुस्तक तथा स्टेसनरी व्यवसायी महासङ्घ म्याग्दीले जनाएको छ ।
समयमै विद्यार्थीको हातहातमा पाठ्यपुस्तक उपलब्ध गराउने उद्देश्यले नयाँ शैक्षिक सत्र सुरु नहुँदै ढुवानी गर्न थालिएको महासङ्घका जिल्ला अध्यक्ष ठाकुरप्रसाद शर्माले बताए । उनले भने बाबियाचौर, दरवाङ, ताकम, सिङ्गा र कुइनेमङ्गले क्षेत्रका विद्यालयका लागि जिल्लामा भित्रिएको पाठ्यपुस्तक पठाइसकेको छ ।
यसैबीच जनक शिक्षा र निजी क्षेत्रका छापाखानामध्ये कसले पुस्तक छाप्ने भन्ने विषयमा समयमै निर्णय हुन नसक्दा कक्षा ६ र ७ को पुस्तकको भने अभाव देखिएको छ । ६ र ७ को पुस्तक जिल्लामा पर्याप्त नभित्रिएको महासङ्घका केन्द्रीय सदस्य लीलाराम गौतमले बताए।
अन्य कक्षा र निजी विद्यालयका पाठ्यपुस्तक भने पर्याप्त भित्रिएका छन् । म्याग्दीमा १ देखि ५ कक्षासम्मका लागि एउटा विषयको तीन हजार सेट र ६ देखि १० कक्षासम्मका विद्यार्थीका लागि एउटा विषयको दुई हजार ६०० सेट पुस्तक आवश्यक पर्छ ।
