इलाम, १७ जेठ । प्रमुख सूचना आयुक्त कृष्णहरि बाँस्कोटाले नागरिकलाई सहज तरिकाले सूचना उपलब्ध गराउन जिल्लास्थित सरकारी कार्यालयका प्रमुखहरूलाई निर्देशन दिएका छन् ।
इलाम सदरमुकाममा आज बिहान आयोजित सरकारी कार्यालय प्रमुखहरूसँगको छलफल तथा अन्तरक्रिया कार्यक्रममा आयुक्त बाँस्कोटाले नागरिकले पाउने सूचनाको हकलाई कुण्ठित गर्न नहुने बताए ।
सूचनाको हकसम्बन्धी ऐनलाई प्रभावकारी ढङ्गले कार्यान्वयन गर्न सकेमा मात्र नागरिकले सहजै सूचना पाउन सक्ने बताउँदै उहाँले कार्यालयले दिन मिल्ने र सार्वजनिक चासोका सूचना तत्काल नागरिकलाई उपलब्ध गराउनुपर्नेमा जोड दिए।
सूचना दिने बानीले भ्रष्टाचारमा कमी, सुशासन कायम हुने हुँदा समृद्ध मुलुक निर्माणमा सहयोग पुग्ने विचार व्यक्त गरे ।
प्रमुख आयुक्त बाँस्कोटाले सरकारी तथा गैरसरकारी कार्यालय, सङ्घसंस्था, सार्वजनिक निकायले नागरिकले पाउने सूचनाको हकबाट कसैलाई पनि वञ्चित गर्न नहुने भन्दै सूचना पाउनु हरेक नागरिकको दायित्व पनि हो भने ।
