काठमाडौं, १९ कार्तिक । ललितपुरको पुल्चोकस्थित श्री लालीगुराँस बहुउद्देश्यीय सहकारी ऋणीको बहुमुल्य घरजग्गा लिलामी गर्ने र लिलामपछि आफ्नै कम्पनि मार्फत मुल्यांकन गर्ने र अन्डर भ्यालुएशन गरेर आफै सकार्ने गरेको तथ्य यसअघि नै आइसकेको छ । आफ्नो सम्पत्ति अन्डर भ्यालुएशन गरेर ठगी गरेको विषयमा २०७४ सालमै नेपाल प्रहरीको केन्द्रीय अनुसन्धान ब्युरो सिआइबीमा उजुरी परेको पाइएको छ । तर, तत्कालिन सिआइबी प्रमुख हालका एआइजी पुष्कर कार्कीको मिलमतोमा ठगीमा समलग्न सहकारीमाथि प्रहरी कारबाही राकिएको खुलाशा भएको छ ।
‘सिआइबीले २ वर्ष अघि नै श्री लालीगुराँस सहकारीका सञ्चालक सुरेन्द्र भण्डारी र सहकारीका उच्च अधिकारीमाथि अन्डर भ्यालुएशन गरी ठगी गरेको अभियोगमा मुद्दा चलाउनुपर्ने हो,’ सिआइबीकै एक उच्च अधिकारीले दियोपोस्टसँग भने,‘त्यतिबेला के कारणले छानबीननै रोकियो हामीले भन्न सकिने अवस्था छैन ।’
सहकारीले सिस्टर कम्पनि खडा गरेर लिलामका नाममा ऋणीको सम्पत्ति कौडीको भाउमा हत्याउने गरेको तथ्य दियोपोस्टले नै सार्वजनिक गर्दै आएको थियो ।
पुल्चोकमा कार्यालय रहेको श्री लालीगुराँस सहकारीकै सिस्टर कम्पनि जय लालीगुराँस इन्भेष्टमेन्ट एण्ड ट्रेडिङ कम्पनि मार्फत अन्डर भ्यालुएशन गर्ने गरेको पाइएको थियो ।
ललितपुरकै स्थानियबासी केशव पुरीको श्री लालीगुराँस सहकारीले आफ्नै सहायक कम्पनि जय लालीगुराँस इन्भेष्टमेन्ट मार्फत अन्डर भ्यालुएशन गरेर करोडौंको सम्पत्ति कौडीको भाउमा हत्याएको पाइएको थियो ।
पुरी सहित उनका साझेदारहरुले २०६७ अषाढमा ललितपुर महानगरपालिका वडा नम्बर ७ नख्खुको जग्गा खरिद गरेको थियो । उनीहरुले कित्ता नम्बर ८५, ११७, ८७, ९३,९५,१०१, १०२ र ८८ नम्बरको ४ रोपनी ७ आना ३ पैसा जग्गा खरिद गरे ।
लालीगुँरास सहकारीबाट २ करोड २० लाख ऋण लिइएको थियो । तर केशव पुरीको भागमा ९० लाख मात्रै ऋण थियो । ऋण लिएको एक वर्षसम्म उनीहरुले सहकारीलाई ब्याज बुझाइरहेका थिए ।
उनको नामको सोही जग्गा सहकारीले २०७० माघमा अन्डर भ्यालुएशन गरेर सकारेको पाइएको छ । उक्त मुद्दा यतिबेला नेपाल प्रहरीको केन्द्रीय अनुसन्धान ब्युरो सिआइबीले २ वर्षअघि नै दर्ता गरेर अनुसन्धान गरेपनि तत्कालिन एआइजी कार्कीको स्वार्थका कारण मुद्दा अघि नबढेको सम्बद्ध स्रोतको दाबी छ ।
उच्च स्रोतका अनुसार सहकारीमाथिको ठगी अभियोगमा छानबीन गर्न ठूलो आर्थिक चलखेल भएको थियो ।
‘म राष्ट्रबैंकमा गभर्नरलाई भेट्न गएको थिएँ । गभर्नरकै सिफारिसको आधारमा म सिआइबीमा उजुरी गर्न पुगेँ । तत्कालिन डिआइजी पुष्कर कार्कीले सिरियस रुपमा लिएर यो कारबाही अघि बढ्छ भन्नु भएको थियो,’ पीडित केशव पुरीले दियोपोस्टसँग भने,‘पछि केकति कारणले त्यो छानबीन नै रोकियो हामीलाई कुनै जानकारी आएन ।’
सिआइबीले त्यतिबेला नै गरेको अनुसन्धानमा ‘अन्डर भ्यालुएशन गरी ठगी गरेको ठहर गरेको थियो । तर, तत्कालिन उच्च प्रहरी अधिकारीकै मिलेमतोमा अनुसन्धान रोेकिएपछि यतिबेला त्यो विषय समेत छानबीनको दायरामा आउने भएको छ ।
पुरीको स्वामित्व रहेको उक्त जग्गा सहकारीले ७६ लाख रुपैयाँमा सकारेको थियो । उक्त जग्गाको हालको मुल्यांकनमा ३० करोड रुपैयाँ भन्दा माथि छ ।
सहकारीका प्रमुख कार्यकारी निर्देशक सुरेन्द्र भण्डारीले नख्खुको उक्त जग्गा सहकारीकै महिला कर्मचारी र आफ्ना आफन्तको नाममा नामसारी गरिसकेको समेत पाइएको थियो ।
त्यस्तै पुरीकै स्वामित्व रहेको ललितपुरको गोदावरी स्थित किटिनी गाविस वडा नम्बर ९ को कित्ता नम्बर १७ को ७ रोपनी ९ आना जग्गाको मुल्यांकन यतिबेला १० देखि १५ करोड छ । तर, सहकारीले भने एक करोड ६ लाख रुपैयाँमा सकारेको पाइएको थियो । गोदावरीको जग्गा भने अन्डर भ्यालुएशन गरेर पनि सहकारीकै नाममा राखिएको छ ।
हाल सिआइबीले छानबीन गरिरहेको उक्त फाइल अघि नबढाउन समेत शक्तिकेन्द्रहरुको दबाव रहेको पाइएको छ । सिआइबीका डिआइजी निरज बहादुर शाहीले शक्तिकेन्द्रकै दबावका आधारमा श्री लालीगुराँस सहकारीको ठगी प्रकरण छानबीन अघि नबढाएको स्रोत बताउँछ ।
कार्की भन्छन्,‘सबै केश कण्ठ पारेर बसिदैन’
यस विषयमा नेपाल प्रहरीका एआइजी पुष्कर कार्कीलाई सम्पर्क गर्दा आफू सिआइबीमा कार्यरत रहँदा पीडितले मुद्दा दिएको स्विकार गर्छन् । यद्धपी सबै प्रक्रियाबारे आफूलाई कुनै जानकारी नभएको उनले बताए ।
‘म हुँदा छानबीन सुरु भएको थिएन जस्तो लाग्छ । मलाई याद छैन । लालीगुराँसको कुरा चाहीँ भएको थियो । तर पछि भिक्टिमहरु आएनन्,’ कार्कीले दियोपोस्टसँग भने,‘निवेदनमै केही कम्प्लिकेशन थियो । पछि कुरा गर्न आउनुस् भन्दा आउनु भएको थिएन जस्तो लाग्छ । त्यसपछि त्यतिकै अड्किएको हो । सिआइबीमा मुद्दा आएपछि टेक्निकल कमिटिले बसेर हेर्छ । त्यो बेला फाइनान्सियल क्राइमहरु धेरै हेरेको थियो । २ वर्षअघिको कुरा सिआइबीलाई नै सोध्नुस् । सबैको केश कण्ड पारेर बसिँदैन नी होइन र !’
